Policia sqaroi ngjarjen e ndodhur mesditën e sotme në rrugën e “Elbasanit” në kryeqytet, ngjarje e cila alarmoi qytetarët pasi u raportua për të shtëna me armë.
Policia arrestoi tre persona të cilët kanë qëlluar më armë në ajër. Ngjarja ka ndodhur në Tiranë në “Rrugën e Elbasanit” pranë “Liceut Artistik”.
Ata kanë qëlluar në ajër teksa ndodheshin në makinën tip fuoristradë, ndërkohë që ktheheshin nga një drekë në Mullet.
Policia menjëherë ka sekuestruar armën e zjarrit, si edhe ka arrestuar shtetasit Ermal Kadilli, Dritan Masha dhe Dritan Ago.
Arma i përkiste shtetasit Ermal Kadilli, i cili u neutralizua nga një police femër.
Njoftimi i policisë
Shërbimet e Komisariatit të Policisë Nr 1, bënë të mundur kapjen në flagrancë të tre shtetasve:
Ermal Kadilli, 36 vjeç, banues Tiranë
Dritan Masha, 36 vjeç, banues Tiranë
Dritan Ago, 35 vjeç, banues Tiranë
Të tre shtetasit e sipërpërmendur udhëtonin në një automjet tip Jeep, me targa AA 425 ON dhe dyshohet të kenë qëlluar me armë pasi kanë dalë nga një resort (bar -restaurant) në Mullet.
Policia ka marrë informacion dhe është vënë në ndjekje te tyre.
Rreth orës 14:40, janë konstatuar në rrugën e “Elbasanit”, nga patrulla e dytë pasi nuk i kanë qëndruar patrullës policore në vendin e njohur si rreth rrotullimi TEG-ut.
Në momentin e ndalimit këta shtetas kanë kundërshtuar punonjësit e policisë dhe menjëherë kanë hedhur jashtë në tokë sendin e kundraligjshëm, një armë zjarri pistoletë tip TT.
Dyshohet se arma i përkiste shtetasit Ermal Kadilli, e cila u sekuestrua në cilësinë e provës materiale.
Në vendngjarje (Mullet)janë gjetur dhe sekuestruar tre gëzhoja.
Policia ndodhet në vendngjarje dhe po punon për sqarimin e plotë të rrethanave të ngjarjes.
