Policia e Kosovës ka arrestuar në Mitrovicë katër persona si të dyshuar për trafikim me qenie njerëzore.
Sipas një komunikate të lëshuar nga Policia hetuesit policor nga Drejtoria për Hetimin e Trafikimit me Qenie Njerëzore pas një pune një vjeçare bazuar në informatat dhe provat që kishin siguruar, më 16 gusht kanë realizuar një operacion policor në Prishtinë, si dhe më 22 gusht ka vazhduar i njëjti operacion policor në Mitrovicë-jug, i cili ka rezultuar me arrestimin e katër personave të dyshuar dhe identifikimin e një viktime të trafikimit me qenie njerëzore .
“Katër personat e dyshuar janë vënë nën pranga nën dyshimin e bazuar se të njëjtit kanë kryer veprën penale ‘trafikim me njerëz , shërbime seksuale të viktimës së trafikimit , mbajtje në pronësi kontroll të armës pa leje dhe keqpërdorim i pozitës apo autoritetit zyrtar’”, thuhet në komunikatën e Policisë.
Si rezultat i punës hetuesit policor kanë arritur të lokalizojnë vendqëndrimin e viktimës, shtetase e Kosovës, e cila ishte mbajtur nën kontroll të plotë nga të dyshuarit po ashtu shtetas të Kosovës.
Personat e arrestuar janë: B. K. (1984), N. M. (1972), A. R. (1975) dhe S. J. (1976).
“Të dyshuarit nën nr-1 dhe 2 tashmë të arrestuar me qëllim përfitimi personal e kanë detyruar viktimën të kryente shërbime seksuale me persona të ndryshëm me pagesë, kurse i dyshuari me nr-3 është arrestuar për veprën penale shërbime seksuale të viktimës së trafikimit, ndërsa i dyshuari me nr-4 zyrtar i policisë, pas hetimeve te përbashkëta me Inspektoratin Policor (IPK-në) i njëjti është arrestuar nga këta te fundit për keqpërdorim të pozitës apo autoritetit zyrtar”, thuhet në komunikatën e Policisë.
Lidhur me rastin është njoftuar mbrojtësi i viktimave dhe në prezencë të tij është intervistuar viktima, e cila është trajtuar sipas procedurave standarde për ndihmë dhe mbrojtje të viktimave.
Po ashtu për rastin është njoftuar edhe Prokurori i Shtetit pran Prokurorisë Themelore - Departamenti për Krime të Rënda në Prishtinë, dhe me vendim të tij të dyshuarit janë dërguar në mbajtje.