Drejtoria për Hetimin e Krimeve Ekonomike dhe Korrupsionit në bazë të urdhëresës së Gjykatës Themelore në Prishtinë, ka realizuar një operacion të suksesshëm policor lidhur me rastin Fajde.
Si rezultat i veprimeve policore është kontrolluar një banesë e cila dyshohet se është prone e personave të dyshuar, si dhe janë arrestuar dy persona me dyshimin se të njëjtit janë përfshirë në dhënie të parave me fajde.
“Personat e dyshuar tanimë të arrestuar, dyshohet se gjatë vitit 2015 viktimës, i kanë dhënë me fajde para në shumën prej 31 mijë e 850 euro, ndërsa i dëmtuari ua ka dhënë-kthyer deri më tani 57 mijë e 300 euro “, thuhet në komunikatë.
Njësitet policore gjate realizimit të bastisjes kanë sekuestruar një armë pistoletë, e cila dyshohet se mbahej pa leje nga personat e dyshuar.
Të dyshuarit M.B. viti i lindjes 1957 dhe F.B. viti i lindjes 1983, pas intervistës me urdhër të prokurorit janë dërguar në mbajtje.