Dera e shtëpisë së familjes Mangjolli nga Mikushnica e Skenderajt, ka mbetur e shkretë, kjo për arsye se kryefamiljari i saj, Safet Mengjolli, i ka dhënë fund jetës së tij.
Situata e rëndë ekonomike dhe sociale në të cilën tash e 15 vjet ka qenë ai me familje, e ka shtyrë atë që të bëjë vetëvrasje.
Sipas familjarëve, kushtet e rënda të jetesës në të cilat ka qëndruar familja pesë anëtarësh e Safetit, gjendja e rëndë financiare dhe borxhet e mëdha, pretendohet të jenë arsyet që e kanë shtyrë atë që të bëjë një akt të tillë.
Mes lotësh dhe trishtimi, vëllai i tij, Gazmendi Mangjolli, rrëfen se si e ka parë vëllain të varur në traun e shtëpisë.
Gazmendi, thotë se që një kohë të gjatë i Safeti ka qenë në depresion dhe në gjendje të rëndë psikologjike, krejt kjo si pasojë e kushteve të rënda me të cilat ai është përballur.
Safeti së bashku me gruan dhe katër fëmijët ka qëndruar në këtë shtëpi njëdhomëshe e të mykosur.
Sipas familjarëve, Safeti që 15 vjet i është drejtuar për ndihmë komunës dhe njerëzve vullnet mirë, por kërkesat kanë hasur në vesh të shurdhër.
Ndërkaq, sipas Komunës së Skenderajt, ndërtimi i shtëpisë së Safetit ishte planifikuar të ndodhte këtë pranverë.
“Është pritë që të rregullohet koha dhe ka pas me i’u ndërtuar shtëpia. Mjetet kanë qenë të siguruar nga një donator i cili ka qenë bashkatdhetar dhe një shtetasi gjerman në bashkëpunim më komune. Mjetet për ndërtimin e shtëpisë së Safet Mangjollit kanë qenë të siguruara, vetëm është pritë që të rregullohet koha dhe të nis ndërtimi i shtëpisë”, thuhet në përgjigjen e Komunës së Skenderajt.
Safet Mengjolli, është gjetur i vrarë në shtëpinë e tij, ai ishte 43 vjeç dhe ka lenë pas vetës katër fëmijë, tri vajza dhe një djalë.
