Policia italiane ka arrestuar një shtetas shqiptar, pasi u dëgjua teksa bërtiste se kishte ardhur për të vrarë ish-bashkëshorten e tij. Duke pasur parasysh precedentët e mëparshëm për të, për dhunë në familje, policia vendosi ta mbante nën vëzhgim dhe ta ndiqte.
Rreth orës 2 të mëngjesit të së mërkurës, ata e bllokuan shqiptarin teksa po përpiqej të futej në shtëpinë e ish-gruas. 51-vjeçari me origjinë shqiptare me banim në Cecina, ishte ndarë nga gruaja pak kohë më parë.
Por, mesa duket ai nuk e ka pranuar këtë situatë. Sipas mediave italiane, edhe në fillim të janarit ai e kishte rrahur ish-bashkëshorten, e cila përfundoi në spital me një prognozë për regjim shtrati 10 ditë.
Ajo e kishte paditur shqiptarin për dhunë në familje. Në të njëjtën kohë u vendos edhe urdhri i mbrojtjes që 51-vjeçari të mos i afrohej gruas në një distancë të përcaktuar.
Tani është në arrest shtëpie nën akuzat për kërcënime dhe shkelje e urdhrit të mbrojtjes.