Gjykata e Selanikut ka shtyrë procesin gjyqësor për vrasjen e të burgosurit shqiptar, Ilia Kareli, dhe shkaku absurd është se gjykata ka angazhime të tjera.
Gjykata do të komunikojë në ditët në vazhdim një tjetër datë për gjykimin e gardianëve që torturuan Karelin deri në vdekje.
Në bankën e të akuzuarve do të ulen 13 gardianë të burgut të Nigritas, që do të përballen me akuzën e torturimit sistematik me rezultat vdekjen e Karelit. Bashkë me ta, edhe ish drejtori i burgut, që akuzohet për mbështetje në vazhdimësi të kriminelit.
Më 25 mars 2014, i burgosuri shqiptar Kudret Kume, që në Greqi prezantohej si Ilia Kareli, goditi për vdekje me thikë gardianin e burgut Malandrinos, Jorgos Tsironis.
Dy ditë më vonë, ai u dërgua në burgun e Nigritas, prej nga doli i vdekur.
Siç nënvizohet në aktakuzën kundër 13 të pandehurve, “ata e nënshtruan të burgosurin në tortura të vazhdueshme me qëllim që ta ndëshkojnë për vdekjen e kolegut të tyre”.
Si rezultat i akteve brutale të gardianëve, i burgosuri shqiptar kishte pësuar fraktura dhe hematoma të shumta, si dhe thyerje të kafazit të kraharorit qe çuan në vdekjen e menjëhershme të shqiptarit Kareli.
