Një person, Elis Deda njohur si anëtar i bandës së Durrësit, së drejtuar nga Lulzim Berisha, është arrestuar në Itali.
Media italiane bën të ditur se, Drejtoria e Antimafies së Kaltanisetës (Caltanisetta) në Sicili në bashkëpunim me policinë kreu 18 arrestime të anëtarëve të klanit mafioz San Cattaldo të zonës së Nisenos, pjesë e Koza Nostrës siciliane.
Mes 18 të arrestuarit ka italianë dhe rumunë, përfshirë edhe kapon e klanit mafioz Antonio Domenico Cordaro, 50 vjeç me pseudonimin “Martadela”.
Në pranga ka rënë edhe durrsaku Elis Deda, 33 vjeç. Sipas Antimafias ai cilësohet peshk i vogël, ushtar në shërbim të koskës mafioze të Koza Nostrës siçiliane, ndërsa për Shqipërinë e sidomos për Durrësin dhe durrsakët Elis Deda është një “VIP”.
Zhdukja e tij në Itali me një sasi të konsiderueshme heroine me vete, vite më parë ishte një nga shkaqet, që përçau bandën e famshme të Lul Berishës.
Sebepi Deda, bëri që më vonë banda të ndahej në dy pjesë në armiqësi për vdekje me njëra – tjetrën.
Kjo armiqësi pati si kosto disa të vrarë e të plagosur, në atentate të stilit mafioz.
Arrestimi i Elis Dedës në Itali, mund të sjellë për kolegët shqiptarë të policisë italiane edhe informacione të reja, për aktivitetin kriminal të bandës së ashtuquajtur të Lul Berishës.
