Arrestohet kryetari i Shoqatës së Jetimëve, Ndoc Lulaj, pasi dyshohet se dogji qëllimisht zyrën e jetimëve.
Sipas policisë 62-vjeçari Ndoc Lulaj, i vendosi dje zjarrin zyrës së Shoqatës së Jetimëve, duke djegur dokumentacionin e inventarit dhe disa pako me ndihma.
“Më datë 21 nëntor 2014, filloi procedimi penal ndaj shtetasit Ndoc Lulaj, 62 vjeç, banues në Balldre, Lezhë, me detyrë kryetar i Shoqatës së Jetimëve Lezhë. Lulaj dyshohet të jetë autor i djegies së Zyrës së Jetimëve në orën 13.00, e cila ndodhet në katin e katërt të një pallati katër katësh, në lagjen “Beslidhja” Lezhë, ku janë djegur dokumentacioni i inventarit dhe disa pako me ndihma. Materialet i referohen Prokurorisë së Rrethit Gjyqësorë Lezhë, për veprën penale “Shkatërrim prone me zjarr”, neni 151 i Kodit Penal”, deklarohet në njoftimin e Policisë së Lezhës.
Ditën e djeshme u raportua se zyra e Shoqatës së Jetimëve u përfshi nga flakët rreth mesditës, por nuk pati të lënduar.
