Oficerët e policisë britanike kanë arrestuar ditën e hënë katër shqiptarë, të cilët u panë duke dalë nga ana e pasme e një kamioni, dhe pas një ndjekjeje të shkurtër, u arrit që të viheshin në pranga për emigracion të paligjshëm.
Sipas medieve angleze, 4 shqiptarët u panë ndërsa dilnin nga ana e pasme e një kamioni të parkuar në rrugën "Mildenhall" në Bury St Edmunds.
Menjëherë pas sinjalizimit të tyre rreth orës 10:00 të mëngjesit, nisi një operacion ndjekjeje për rreth një orë e gjysmë, që u finalizua me kapjen e të gjithë të dyshuarve, ku në operacion u përdor dhe një helikopter i policisë britanike.
Identiteti i të arrestuarve nuk është bërë ende i ditur, por është raportuar se janë të gjithë meshkuj dhe të moshës 21, 26, 37 dhe 40 vjeç, të cilët po mbahen në Qendrën e Hetimit të Suffolk.
Akuza që rëndon ndaj të akuzuarve është ajo e emigracionit të paligjshëm.