Policia e Lushnjës po vazhdon kërkimet për një turist austriak 62 vjeç, me inicialet E.A, i cili rezulton i zhdukur në rrethana tepër misterioze.
Ai ka humbur kontaktet që prej datës 16 gusht, ndërkohë që vetëm në datën 20 gusht është bërë denoncimi për zhdukjen e tij.
Denoncimi për humbjen e turistit është bërë nga një 43-vjeçare me inicialet E.K, banuese në qytetin e Lushnjes e cila ka deklaruar dhe pohuar se shtetasi austriak ka qenë i akomoduar në Lushnjë nën kujdesin e një shoqate që operon në këtë qytet dhe që pret çdo vit turistë nga e gjithë bota. Sipas gruas, ai ka mbyllur telefonin dhe askush nuk pasur mundësinë të kontaktojë me të prej disa ditësh.
“Jam administratore e një shoqate në Lushnjë. Çdo vit vijnë turistë në Lushnjë dhe ne si shoqatë i presim dhe i akomodojmë duke shërbyer edhe si operatorë turistikë për ta. Shtetasi 62-vjeçar E. A., nga Austria, në datën 16 gusht është nisur për në Fier e më pas donte të vazhdonte për në Gjirokastër. Ai ka udhëtuar i vetëm, pasi ka qenë dhe më parë në Shqipëri”, ka thënë denoncuesja.
Policia sqaron se ai ka me vete dokumente identifikimi, të cilat e bëjnë lehtësisht të identifikueshëm. Nuk dihet nëse 62-vjeçari vuante nga ndonjë sëmundje. Sipas policisë, nëpërmjet ambasadës do të njoftohen edhe autoritetet austriake lidhur me rastin, ndërsa shpresojnë që turisti të mos ketë pësuar ndonjë incident.