Një kazino në zonën e Skelës në Vlorë është grabitur me armë zjarri mbrëmjen e sotme, rreth orës 21:30. Ngjarja ndodhi në pikun e xhiros së qytetarëve, ku zona ishte tejet e populluar me kalimtarë.
Dy persona kanë hyrë në ambientet e brendshme të kazinosë dhe nën kërcënimin e armës kanë kryer grabitjen. Mirëpo ata janë ndeshur me rojen private të kazinosë kur po nxitonin të dilnin në ambientet e jashtme të kazinosë.
Gjatë këtij konflikti ka pasur të shtëna nga ana e grabitësve, por si pasojë e përplasjes me rojen private, njëri prej tyre mbeti i plagosur.
Janë ende të paqarta rrethanat nëse ishte grabitje apo tentativë pasi policia është e rezervuar, ndërsa personi i dytë është identifikuar nga kamerat e kazinosë dhe të lokaleve përreth.
Dëshmitarët tregojnë se nëse arma kallashnikov do të qëllonte dëmet në njerëz mund të ishin fatale. Forcat e policisë kanë shoqëruar nën cilësinë e dëshmitarit disa kalimtarë dhe persona që mund të kenë dijeni mbi këtë grabitje kazinoje, por që doli me sukses falë ndërhyrjes së policit të kufirit i ndodhur rastësisht në zonë.
Më pas ndërhynë edhe policë civilë pasi kjo zonë është tejet e monitoruar nga policë me dhe pa uniforme.
Policia e Vlorës ka mbërritur menjëherë në vendngjarje, duke bërë të mundur ndalimin e grabitësit dhe sekuestrimin e armës së zjarrit, tip "automatik", që u përdor nga grabitësit.
Ndërkaq, blutë po vijojnë punën për hetimin e plotë të ngjarjes, identifikimin dhe kapjen e personit tjetër që mori pjesë në grabitje.
