Pjesëtarë të Policisë së Kosovës në veri, kanë arrestuar të enjten R.S. nga Zveqani, njërin nga sulmuesit të cilët kishin vjedhur një ditë më herët rreth 2 milionë dinarë (18 mijë euro) nga ‘Komercijalna Banka Beograd’ në Zveqan.
Ngjarjen e ka konfirmuar edhe zëvendës drejtori i policisë për rajonin e veriut, Besim Hoti.
Sipas tij, policia ka arritur të gjejë dje dhe sot rreth 1 milion e 200 mijë dinarë të vjedhura, ndërsa është në kërkim edhe të një dyshuari tjetër në lidhje me ngjarjen.
“Një shumë të parave të vjedhura që u kishin rënë hajnave gjatë ikjes, qytetarët i kanë dorëzuar në polici”, ka thënë Hoti.
Ndryshe, të mërkurën rreth orës 15:00, dy persona të maskuar dhe nën kërcënim të armëve, kanë arritur të vjedhin një sasi të konsiderueshme të dinarëve nga Banka Komerciale në Zveqan, ndërsa nuk ka pasur të lënduar.