Ka vrarë gjyshen duke e goditur me bastun, vetëm për të përfituar 50 euro. Ndërsa e moshuara ishte duke dhënë shpirt, nipi i saj 24 vjeçar, Costanzo Baci, i njohur si Giovanni, i ka marrë nga gishtat unazat prej floriri.
Vetë ai ka rrëfyer në polici për vrasjen e gjyshes 89 vjeçare, Antonietta Di Luciano, e cila u gjet pa jetë të mërkurën në mëngjes, në shtëpinë e saj në Lusciano, në provincën e Casertës në Itali. Gruaja ishte e shtrirë në shtratin e saj dhe e mbuluar me çarçaf.
Ai që ka dhënë alarmin dhe është shqetësuar për gruan, ka qenë i biri. Fillimisht mendohej se bëhej fjalë për një vjedhje e cila kishte përfunduar keq, por fakti që porta hyrëse e shtëpisë ishte e hapur dhe mbi të nuk kishte shenja të ushtrimit të forcës, bënë që karabinierët të dyshonin. Pra, viktima e njihte vrasësin e saj.
“E vrava gjyshen sepse më duheshin paratë”, ka thënë nipi vrasës për policët. I riu e ka goditur disa herë pa mëshirë me bastunin e saj në pjesë të ndryshme të trupit dhe në fund i ka marrë edhe unazat nga gishti, ndërsa 89 vjeçarja ka qenë duke vdekur.
Sipas hetuesve, i riu kishte hyrë në shtëpi, ka shkuar në dhomën e gjumit të të moshuarës dhe më pas e ka goditur atë në kokë. Ka marrë 50 euro në kasafortë, duke lënë aty 170 të tjera bashkë me disa monedha ari, për të menduar se bëhej fjale për vjedhje.
