Një vajzë 24-vjeçare shqiptare udhëtoi për në Itali me premtimin për punë, por u detyrua të punonte me numrin 30 të shkruar në dorë.
Pas denoncimit të saj, policia ka arrestuar dy shqiptare për prostitucion. Gjithashtu është dhe një person i tretë i dyshuar, një grua e cila ka bindur 24-vjeçaren të largohet nga “toka e shqiponjave”.
Ajo mbërriti në shkurt në Campania me premtimin se do të gjente një punë si bariste. Por në fakt u detyrua që të punonte si prostitutë edhe pse nuk dinte asnjë fjalë italisht.
Për zgjidhjen e këtij “problemi” tutorët i shkruanin në dorë numrin 30 për të treguar “tarifën”.
Dy shfrytëzuesit e dërgonin 24-vjeçaren çdo ditë në një stacion treni dhe në darkë e merrnin për ta dërguar në shtëpi.
Shpeshherë ndaj saj është ushtruar dhunë, duke i thyer edhe dhëmbët.
Dy javë pas shfrytëzimit si prostitutë, vajza ka marrë kurajë për të bërë denoncim dhe për të kërkuar ndihmë në disa fjalë që dinte në anglisht.
Policia u ndihmua nga një përkthyes që të kuptonte tmerrin e kaluar nga 24-vjeçarja.