Zvicra investon edhe 7 milionë frang në sektorin e ujit të pijes

Kosova

Zvicra investon edhe 7 milionë frang në sektorin e ujit të pijes

Më: 13 korrik 2018 Në ora: 16:02
Foto nga nënshkrimi

Qeveria zvicerane do të investojë edhe 7 milionë franga në sektorin e ujërave. Kjo u bë e ditur gjatë nënshkrimit të marrëveshja financiare ndërmjet Ministrisë së Financave dhe Qeverisë Zvicerane për “Programin Mbështetës për Ujësjellës dhe Kanalizim në Zonat Rurale, Faza VI”.

Me këtë rast, ministri i Financave, Bedri Hamza, ka falënderuar qytetarët zviceran që me taksat e tyre po ndihmojnë qytetarët e Kosovës të kenë qasje në ujësjellës dhe ujë të pijes.

Hamza shtoi se investimet do të zgjerohen edhe në komunat siç është Zubin Potoku, Zveçani dhe Leposaviqi, që do të thotë se Kosova me përkrahjen e miqve të saj investon në gjithë territorin e Kosovës në përmirësimin e jetës së gjithë qytetarëve të saj.

Hamza: Deri me tani shteti zviceran ka investuar 38 milionë frang

“Ka shumë nevoja, ka shumë prioritete vendi ynë, por investimet e taksapaguesve zviceran në Kosovë janë në top prioritete. Nuk ka më prioritet se të përmirësojmë furnizimin me ujë të qytetarëve të Kosovës i cili ndikon drejtpërdrejtë në ngritjen e standardit të tyre dhe i cili e ruan shëndetin e qytetarëve të Kosovës. Deri më tani shteti zviceran ka investuar 38 milionë frang. Sot marrëveshja të cilën e nënshkruam janë edhe 7 milionë frang investime në këtë sektor, i cili do të përmirëson, zgjeron dhe do të rritë përqindjen e popullsisë që janë të lidhur me rrjetin e ujësjellësit”, tha Hamza.

Hamza bëri me dije se nga fillimi i këtij mandati si ministër deri sot, ka sjellë mbi 80 milionë euro grante në sektorin e ujërave.

Ndërsa, ambasadori i Zvicrës në Kosovë, Jean Hubert Lebet theksoi se kjo fazë do të shënojë fazën përfundimtare të programit të ujit në zonat rurale. Ai shtoi se me përfundimin e saj të planifikuar në vitin 2020, do të kenë mbi 90 për qind mbulueshmëri të popullsisë me një furnizim të rregullt me ujë.

Lebet: Kemi arritur të bëjmë diçka shumë të mirë

“Kemi arritur të bëjmë diçka shumë të mirë dhe për të arritur atë që 90 për qind e familjeve të jenë të furnizuara me ujë të pijshëm. Dua të falënderoj Qeverinë e Kosovës dhe Ministrinë e Financave për kontributin tuaj për këtë fazë të projektit. Tani e shohim se ju po e merrni tërë këtë sektor mbi vete dhe që do të bashkëpunojmë bashkërisht me qëllim që ta zbatojmë këtë projekt. Ideja është që të kemi qëndrueshmëri në këtë sektor, pra sektorin e ujërave. Për gjatë këtyre viteve ju kemi mbështetur por tani ju ka mbetur juve që të merrni përsipër këto obligime dhe t’i kryeni vet dhe unë jam i bindur se ju jeni në gjendje ta bëni këtë”, tha Lebet.

I pranishëm në nënshkrimin e kësaj marrëveshje ishte edhe Ministri i Zhvillimit Ekonomik, Valdrin Lluka, i cili tha se ky projekt ka rëndësi të madhe sepse e rregullon me tepër infrastrukturën dhe i ofrohet asaj që ka për qëllim Qeveria, mbulueshmërinë 100 për qind të qytetarëve me ujë të pijes.

Lluka: Qëllimi i projektit është që t’i inkuadrojmë të gjitha fshatrat në sisteme të ujësjellësve

“Qëllimi i këtij projekti është që t’i inkuadrojmë të gjitha fshatrat me sisteme të ujësjellësve rajonal për t’iu siguruar ujë të sigurt të pijes për gjithë ata banorë. Dhe me përfundimin e këtij projekti do të kemi mbi 91 për qind të popullatës së Kosovës në sistemin e ujësjellësve rajonal, një ujë i kontrollueshëm, me furnizim të rregullt dhe gjëra të tilla”, u shpreh Lluka.

Ky program është zhvilluar edhe në disa faza tjera ku është investuar në regjione të ndryshme të Kosovës.

Sot mund të lexoni Shfletoni kopertinat