Emisioni “Drejtësia në Kosovë” kësaj radhe transmetoi hulumtimin ekskluziv që tregoi se si iu mbyll rasti djalit të prokurorit special Haki Gecaj, i cilit ishte kapur me drogë.
Hulumtimi solli fakte dhe dëshmi për mënyrën se si prokurori e shtetit i trajton rastet kur të dyshuar janë familjarë të prokurorëve.
Gjetjet treguan se si mbrëmjen e 10 nëntorit të vitit 2014-të një patrullë policore kishte ndaluar një makinë në dalje të Prishtinës, saktësisht në vendin e njohur si “Rrethi i Flamurit”. Gjatë bastisjes Policia kishte zbuluar një sasi droge prej 1.85 gramë marihuanë te Valdrin Gecaj, djali i prokurorit special Haki Gecaj dhe tek shoku i djalit të tij.
Detajet e hulumtimit treguan se si e ka arsyetuar prokurorja Arbëresha Shala – Raqa mbylljen e rastit të djalit të kolegut të saj prokuror, duke u thirrur në disa nene të Kodit Penal dhe atij të Procedurës Penale, edhe pasi Valdrin Gecaj e kishte pranuar se ishte zënë me drogë.
Siç transmetoi “Drejtësia në Kosovë”, edhe pse djali i prokurorit Haki Gecaj dhe shoku i tij e kishin pranuar fajësinë se kanë pasur drogë, prokurorja kishte vendosur që t`i lironte nga ndjekja penale.
Hulumtimi tregoi se në aktvendimin për pushimin e rastit, prokurorja Arbëresha Shala, kishte shkruar se të dyshuarit janë penduar thellë për veprimin e tyre dhe kjo ishte njëra nga arsyet që prokurorja e kishte mbyllur rastin.
Siç dëshmoi hulumtimi, prokurorja Shala nuk kishte pranuar të intervistohet nga ekipi I “Drejtësia në Kosovë”. Por në një përgjigje të saj që emisioni ka pranuar përmes zëdhënësit të Prokurorisë së Shtetit, prokurorja Shala ishte kujdesur që të njëjtën përgjigje t`ia dërgonte edhe kolegut të saj Haki Gecaj, djalit të të cilit ia kishte mbyllur rastin e drogës.
As prokurori Haki Gecaj siç transmetoi emisioni nuk kishte pranuar që të intervistohej, madje ai kishte kërkuar nga ekipi i “Drejtësia në Kosovë” që të mos merreshin fare me rastin e djalit të tij me arsyetimin se ishte zënë me sasi të vogël të drogës dhe se kanë kaluar vite.
