Njohësi i Integrimeve Evropiane, Naim Rashiti, ka shprehur bindjen e tij se pas ratifikimit të demarkacionit do të përshpejtohet procesi i liberalizimit të vizave, dhe se rekomandimi mund të vjen në qershor, më së largu në shtator.
“Është mrekulli, më në fund”, tha Rashiti në Zonën e Debatit, duke shtuar se nga kjo çështje janë nxjerrë edhe dy-tre mësime.
“Çështja tjetër është metodologjia e punës së institucioneve dhe liderëve duhet të ndryshojë, dhe të ketë një parapërgatitje për çfarëdo lloj marrëveshje që bëhet”.
“Edhe pse u kry, nuk është dashur që të kryhet siç ka përfunduar dje”.
“Këto tre-katër mësime janë shumë të rëndësishme për procesin e shtet-ndërtimit, që të mos kemi telashe të përsëritura të cilat do të vijnë dhe do të jenë edhe më të rënda”.
Rashiti tha se raporti vlerësues i BE-së është progresiv, ndërsa për çështjen e demarkacionit tha se ka qenë vendim që duhej marrë nga deputetët e Kosovës.
“Demarkacioni ishte çështje vendimi, akti. Duhej bërë akti në mënyrë që të kalohej në pjesën e vlerësimit progresiv”.
“Në qershor jam i bindur që në qershor do të ketë një rekomandim të fuqishëm, dhe ndoshta edhe një vendim por më së largu në shtator”.
Ai shprehu bindjen e tij se pas ratifikimit të demarkacionit, do të ndodhë edhe përshpejtimi i procesit për liberalizim të vizave.
“Jam i bindur që procesi i liberalizimit të vizave do të përshpejtohet”, tha Rashiti.
Sa i përket luftimit të krimit dhe korrupsionit, Rashiti bëri të ditur se kjo i mbetet institucioneve kosovare që ta pasqyrojnë situatën sa më mirë që është e mundur.