Kryetar i SBASHK-ut, Rrahman Jasharaj, ka deklaruar se të gjithë kanë pritur se institucionet e Kosovës do ta njohin me një ligj kohen e qëndresës së arsimit e kulturës sonë, por, kujtesa e pushtetarëve për ato vite heroike është zbehur dhe mbase përvjetori i pavarësisë mësuesin do ta gjej pa ligjin e vet.
Ai në një opinion dërguar mediave, ka thënë se pushtetarët mund të festojnë e t’i thurin vetit himne e lëvdata, por duke festuar duhet të trokasin në kujtesën e tyre dhe një zë brenda tyre do t’u thotë se nuk e kanë kryer borxhin ndaj atyre që kanë vënë gur të palëkundur në themelet e shtetit.
....................................................................
Mësuesi i viteve të 90-ta pa ligjin e vet në përvjetorin e pavarësisë
Pushtetarët mund të festojnë e t’i thurin vetit himne e lëvdata, por duke festuar le të trokasin në kujtesën e tyre dhe një zë brenda do t’i pyes se a kanë kryer borxhin ndaj atyre që kanë vënë gur të palëkundur në themelet e shtetit, që po feston përvjetorin e pavarësisë.
Qytetet e Kosovës po marrin pamje festive në 10 vjetorin e pavarësisë. Po zhvillohen e do të zhvillohen edhe shumë aktivitete sportive e kulturore për ta shprehur gëzimin dhe krenarinë për dekadën e parë të mëvetësisë të shtetit tonë, pra të Republikës së Kosovës.
Janë këto momente kur edhe krerët e shtetit duhet të shpalosin kujtesën dhe të mos lakojnë që të marrin gjithë meritat, po të kujtojnë ngjarje nëpër vitet e shkuara. Nuk po e them vetëm unë si kryetar i SBASHK-ut, por këtë e kanë thënë edhe shumë e shumë të tjerë se njërin nga gurët e parë në themelet e shtetësisë së Kosovës e kanë vënë punëtorët e arsimit shqip duke kundërshtuar fuqishëm përpjekjen e pushtuesit që të vë nën kthetra e dirigjime arsimin dhe kulturën tonë. Punëtorët e arsimit në vitet e 90-ta u kthyen në një digë të fortë dhe i mësuan fëmijët e asaj kohe shqip dhe me planet e Republikës së Kosovës. Sfiduan pushtuesin dhe armët e tij me laps e libër dhe me dokumentet me mbishkrimin Republika e Kosovës . Pushtuesi përdori gjithë atë dhunë për t’i tërhequr nga ky ideal, por dashuria për gjuhën e kult urën tonë dhe vullneti për ardhmërinë e pavarësinë e shtetit i bëri më të fortë se kurrë njerëzit e dijes nëpër gjithë vitet e 90-ta. Nga populli ynë këta njerëz në ato kohë të vështira u quajtën heronj të gjallë dhe të gjithë kanë pritur se institucionet e Kosovës së lirë do ta njohin me një ligj këtë kohë të qëndresës së arsimit e kulturës sonë. Por, kujtesa e pushtetarëve për ato vite heroike është zbehur dhe mbase përvjetori i pavarësisë mësuesin do ta gjej pa ligjin e vet. Nëse ndodh kështu atëherë pushtetarët mund të festojnë e t’i thurin vetit himne e lëvdata, por duke festuar le të trokasin në kujtesën e tyre dhe një zë brenda tyre do t’u thotë se nuk e kanë kryer borxhin ndaj atyre që kanë vënë gur të palëkundur në themelet e shtetit, që po feston përvjetorin e pavarësisë.
Prishtinë, 12 shkurt 2018
