Ministrja e Tregtisë dhe Industrisë (MTI), Hykmete Bajrami, priti sot në takim ambasadoren e Republikës së Kroacisë në Kosovë, Marija Kapitanoviç.
Bashkëbisedueset folën lidhur me intensifikimin e mëtejmë të bashkëpunimit ndërshtetëror në fushën e ekonomisë ndërmjet Republikës së Kosovës dhe Republikës së Kroacisë.
Siç njofton MTI, ministrja Bajrami e informoi ambasadoren kroate rreth reformave ekonomike, nëpër të cilat po kalon vendi si dhe për zbatimin e prioriteteve që ndërlidhen me agjendën e integrimeve evropiane, përfshirë edhe zbatimin e Marrëveshjes për Stabilizim Asociim me BE-në.
Nga ana e saj, ambasadorja Kapitanoviç shprehu gatishmërinë e qeverisë kroate për të mbështetur Ministrinë e Tregtisë dhe Industrisë dhe institucionet e Kosovës në implementimin e suksesshëm të masave që ndërlidhen me MSA-në si dhe në fusha tjera ekonomike.
