Sot shënohet 18 Tetori - Dita Evropiane Kundër Trafikimit me Qenie Njerëzore .
Për të shënuar këtë ditë, Zyra e Koordinatorit Nacional Kundër Trafikimit me Qenie Njerëzore e Ministrisë së Punëve të Brendshme, do të organizojë konferencë për Ditën e BE-së Kundër Trafikimit me Qenie Njerëzore.
Në këtë konferencë që do ta udhëheqë, ministri i Punëve të Brendshme, Skender Hyseni, do të marrin pjesë: Presidenti i Kosovës Hashim Thaqi, kryeministri Isa Mustafa, ambasadori i SHBA-ve në Kosovë, Greg Dellawie, shefja e Zyrës së BE-së në Kosovë, Nataliya Apostolova, ministra të kabinetit qeveritar, përfaqësues të këshillit gjyqësor, prokurorial dhe të Policisë së Kosovës.
Ndryshe, trafikimi i qenieve njerëzore është njëra nga mënyrat moderne të skllavërisë, ku kryesisht vajzat e reja, detyrohen që të ofrojnë shërbime seksuale me detyrim. Viktimat, të cilat bien pre e trafikantëve, pas shfrytëzimit, në shumë raste përfundojnë jetën e tyre tragjikisht.
Dukuria e trafikimit ka filluar të shfaqet viteve të fundit edhe në Kosovë, ku kryesisht vajza që detyrohen të merren me këto aktivitete të jashtëligjshme janë nga Kosova, Shqipëria, Serbia dhe shtet e Evropës Lindore.
