Rreth 20 mijë banorë të komunës së Lipjanit do të përfitojnë nga projekti i investuar nga Ministria e Infrastrukturës për asfaltimin e rrugës Gadime e Epërme-Smallushë-Sllovi.
Banorët e Sllovisë dhe të Gadimes nuk do të kenë nevojë të dalin në rrugën magjistrale, por do ta kenë mundësinë përmes kësaj rruge të qarkullojnë lirshëm, e cila lidh një pjesë të madhe të popullatës.
Me këtë rast, ministri i Infrastrukturës, Lutfi Zharku, me bashkëpunëtorë dhe kryetari i Komunës së Lipjanit, Imri Ahmeti, përuruan fillimin e punimeve për asfaltimin e kësaj rruge.
Ministri Zharku falënderoi kryetarin Ahmeti dhe banorët e kësaj zone për mirëkpritje dhe i siguroi ata se Ministria e Infrastrukturës do të vazhdojë të investojë projekte të tjera këtë vit dhe vitin e ardhshëm në përmirësimin e infrastrukturës lokale në komunën e Lipjanit.
“Kryetar, fillimisht të falënderoj për ftesën që më keni bërë për të vizituar këtë zone. dhe së bashku me të gjithë këta bashkëqytetarë tuaj për të përuruar fillimin e punimeve në këtë rrugë të një rëndësisë të posaçme për banorët e Smallushës, Gadimes së Epërme edhe të Sllovisë. Ky investim është në vlerë 440 mijë euro dhe gjatësia e rrugës është 5 kilometra. Përveç kësaj, ju e dini se tanimë jemi në procedura të prokurimit për fillimin e projekteve tjera infrastrukturore në komunën e Lipjanit, e që do të vazhdojmë me rehabilitimin e rrugës Lipjan-Magurë, dy rrethrrotullimeve që janë shumë të rëndësishme, rrethrrotullimi i Janjevës dhe ai te Burgu i Lipjanit. Në anën tjetër ne bashkërisht kemi biseduar që vitin e ardhshëm të përfshihen edhe disa projekte të tjera në përputhje me prioritetet që i keni ju si Komunë dhe që po bëhen në bashkëpunim me të gjithë qytetarët tuaj. Unë ju falënderoj për projektet që po i bashkëfinancojmë. Ne po kontribuojmë në rregullimin e infrastrukturës lokale. Jam i bindur se një infrastrukturë shumë më e mirë po mundëson zhvillim ekonomik më të mirë dhe natyrisht zhvillim të bujqësisë. Ju falënderoj edhe njëherë për këtë pritje të mirë”, theksoi ministri Zharku.
Ndërsa, kryetari Ahmeti falënderoi ministrin Zharku për mbështetjen e madhe në përmirësimin e infrastrukturës lokale në komunën e Lipjanit.
“Po e asfaltojmë një rrugë të një rëndësie shumë të madhe sepse kjo rrugë lidh fshatrat me shumë banorë. Unë e falënderoj ministrin Zharku edhe në emrin tuaj, që gjeti mundësi financiare për të filluar ndërtimin e kësaj rruge. Besoj se do të jetë një arterie e mirë e rrugës dhe në perspektivë do të ndikojë shumë në zhvillimin e kësaj zone. Faleminderit shumë Ministër dhe posacërisht i falënderoj banorët e kësaj zone për bashkëpunim të madh në realizimin e këtij projekti”, theksoi kryetari Ahmeti.
Ky investim i Ministrisë së Infrastrukturës ka një gjatësi prej 5 kilometra, ndërsa vlera e realizimit të tij është 439,916.54 euro.
Ministria e Infrastrukturës do të investojë edhe projekte të tjera kapitale në këtë komunë siç janë: rruga “Lipjan- Magurë”, disa rrethrrotullime në Lipjan dhe një arterie e re që lidhë qytetin e Lipjanit me magjistralen Prishtinë – Hani i Elezit, që do të fillojë së realizuari në fillim të vitit 2017.
