Kryetari i Kuvendit, Ilir Meta deklaroi pak momente më parë se i kishte dërguar zyrtarisht një ftesë kryetarit të Partisë Demokratike për takim në kuadër të reformës në drejtësi. Meta vuri si afat të fundit ditën e hënë, duke theksuar se tashmë ishte shumë për miratimin e ndryshimeve kushtetuese.
Meta: Si kryetar i Kuvendit, i kam dërguar sot një ftesë dhe kërkesë zyrtare kryetarit të Partisë Demokratike Lulzim Basha, për t’u takuar me të në çdo kohë, në çdo vend që ai e gjykon të arsyeshme dhe në çfarë do lloj formati që ai e gjykon të arsyeshme, mundësisht deri ditën e hënë, pasi jam i bindur se jemi tashmë të vonuar në kalendarin për ndryshimet kushtetuese për reformën në drejtësi, e cila nuk është përfshirë deri më tani për arsye të mos arritjes së kompromisit përfundimtar në komisionin e posaçëm të kësaj reforme.
Por, ndër jemi në krizë me kohën dhe duhet të reflektojmë dhe të lëvizim sa më shpejt në mënyrë që ky proces të zhvillohet me cilësinë e duhur, sipas standardeve të Komisionit të Venecias, por edhe sipas sugjerimeve të EURALIUS dhe OPDAT-t dhe jo vetëm kaq, por përveç cilësisë së kërkuar, ky proces të gëzojë dhe të gjithë legjitimitetin dhe integritetin e plotë që meriton si kryereforma që i nevojitet vendit.
Jemi në krizë kohe sepse duhet të ishte përfshirë me kohë në kalendarin e Kuvendit, por unë besoj që me vullnetin e të gjitha palëve dhe me vullnetin e opozitës, shpresoj shumë, që ta miratojmë sa më parë dhe ta fitojmë kohën që kemi humbur. Unë jam i hapur për cdo format të takimit. Jam shumë fleksibël e bashkëpunues.
"Përfshirja e reformës në kalendarin trejavor të Kuvendit, ishte keqkuptim”
Meta deklaroi gjithashtu se ishte një gabim futja në agjendën trejavore të punimeve të Kuvendit miratimin e kësaj reforme.
Meta: Mund t’ju them se kjo çështje është sqaruar edhe me kryetarin e grupit parlamentar të Partisë Demokratike, zt.Paloka. Ka qenë një keqkuptim i shërbimeve të Kuvendit dhe kjo çështje nuk është në kalendarin e Kuvendit, ndërkohë që është çështja më e rëndësishme për të gjithë.
Takimi Rama-Basha pozitiv, por i vonuar
Kreu i Kuvendit komentoi edhe takimin Rama-Basha, duke theksuar se ishte takim i vonuar dhe se reforma në drejtësi mund të ishte miratuar që në muajin prill.
Meta: Besoj se qëllimi i ftesës është shumë i qartë. Vullneti është maksimal. Takimi i zhvilluar midis zt.Basha dhe zt. Rama është një hap shumë pozitiv. Mendoj se ka qenë një takim shumë i vonuar, që duhet të ndodhte prej kohësh.
Edhe reforma në drejtësi mund të kishte kaluar më parë, të paktën në muajin prill. Jo çdo gjë zgjidhet me një takim, por jam i bindur se nëse ekziston vullneti i plotë dhe i vërtetë dhe nuk kam pse ta dyshoj këtë si kryetar i Kuvendit, gjithçka mund të zgjidhet shumë shpejt duke garantuar cilësinë e reformën.
I pyetur për qëndrimin e Lëvizjes Socialiste për Integrim që reforma të bëhej me konsensus, Meta tha se nuk dëshironte të komentonte për këtë, pasi sot kishte dalë në konferencë ekskluzivisht si kryetar i Kuvendit.
Meta theksoi se miratimi i kësaj reforme është shumë i rëndësishëm për hapjen e negociatave për anëtarësim në BE.
Meta: Miratimi i kësaj reforme në Kuvendin e Shqipërisë me cilësinë e duhur dhe me legjitimitetin dhe integritetin e duhur, është shumë e rëndësishme për të rritur besueshmërinë në mënyrë që të forcojmë argumentet për të marrë rekomandimin për hapjen e negociatave për anëtarësim në BE.
Është shumë e rëndësishme që reforma të miratohet sa më parë edhe për të bërë sa më shpejt efektive asistencën, në mënyrë të veçantë të Shteteve të Bashkuara.