​Studimja përkujton martirët që u vranë para 17 vjetësh (Foto)

Kosova

​Studimja përkujton martirët që u vranë para 17 vjetësh (Foto)

Më: 2 maj 2016 Në ora: 10:26

(E plotësuar) - Qindra qytetarë janë mbledhur sot në fshatin Studime të Vushtrrisë për të përkujtuar 116 martirët, të cilët u vranë dhe u masakruan nga forcat serbe më 2 maj të vitit 1999.

Me këtë rast të pranishmit kanë deklaruar se sa herë që vijnë në këtë fshat e kujtojnë vrasjen e gjithë këtyre gjeneratave me dhimbje por edhe krenari.

Për të përkujtuar martirët e Studimes kishte ardhur edhe presidenti Hashim Thaçi së bashku me bashkëshorten e tij, e cila është nga ky fshat.

Me këtë rast presidenti Thaçi, tha se forcat paramilitare serbe në Studime të Vushtrrisë kryen vrasje, vjedhje e përdhunime të ndryshme.

Thaçi: Kam dëgjuar e lexuar për vrasjen e 140 banorëve të Studimes

“Këto vendbanime, krahas betejave historike të UÇK-së dhe rezistencën qytetare na kujtojnë gjithmonë çmimin e lirisë dhe pavarësisë sonë. Na kujtojnë vrasjen e grave dhe të burrave, të nënave dhe të baballarëve, të rinjve dhe të rejave, të pleqve dhe fëmijëve të cilët u flijuan për lirinë që e gëzojmë ne sot. Zonja dhe zotërinj, pas shekujsh përpjekjesh për liri Kosova më në fund e ka arritur mbështetjen e botës demokratike, pas 17 vitesh UÇK, bombardimet aleate më të fuqishme ushtarake të botës të NATO-s mbi caqet policore serbe po jepnin goditjet e fundit pushtimit të Kosovës. Forcat serbe nuk kursenin asgjë, vidhnin, plaçkitnin, dhe dëbonin popullsinë civile nga vatrat e tyre. Për të shkuar edhe më tej pas çdo humbje në terren nga UÇK-ja bëheshin dhe më agresive, duke dhunuar, vrarë, masakruar dhe duke bërë gjenocid dhe pastrim etnik. Para 17 vitesh edhe këtu në Studime të Vushtrrisë popullata civile e përjetoi një tmerr të vërtetë. Kam dëgjuar dhe lexuar përjetime të familjarëve për masakrën e Studimes, për vrasjen e burrave në sy të grave, për vrasjen e djemve në sy të nënave, për vrasjen e dhëndrit një ditë pas martesës, për vrasjen e 140 personave”, tha Thaçi në Studime.

Për masakrën e Studimes ka folur edhe kryetari i Vushtrrisë, Bajram Mulaku,i cili tha se në këtë masakër janë vrarë edhe ga e fëmijë.

Mulaku: U vranë gra e fëmijë

“Mbi 100 njerëz të paarmatosur duke përfshirë gra, fëmijë, pleq, në natën e 2 majit do të vriten në këtë lëndinë, ndërsa përgjatë gjithë luftës do të rriten rreth 140 të kësaj ane po në këtë lëndinë, është një ndër masakrat më të rënda në periudhën e luftës së UÇK-së të ndodhur në Kosovë. Dhe fatkeqësisht deri sot përkundër faktit që këto varreza janë dëshmi dhe ka shumë njerëz që kanë qenë dëshmitarë sot këtu e ata që tentojnë asnjë herë deri më sot askush nuk është marrë në pyetje dhe askush nuk ka dhënë përgjegjësi për këtë masakër të rëndë që e ka bërë ushtria serbe, paramilitarët serb edhe ata lokal të Vushtrrisë”, tha Mulaku.

Për të nderuar martirët në Studime sot ishte edhe kryetari i AAK-së Ramush Haradinaj, i cili tha se sa herë vjen në këtë fshat sheh se sa shumë njerz kanë dhënë jetën për liri.

Haradinaj: Lavdi dëshmorëve të Studimes

“Familjarë të martirëve që i kujtojmë sot, të dëshmorëve dhe familjarë, udhëheqës të institucioneve qendrore e komunale, gjithë ju prezent është ndjenjë dhimbjesh, ndjenjë krenarie gjithashtu sa herë që vij në Studime e shohim gjenerata e gjenerata të reja të flijuara për liri edhe ne me respektin më të madh i bashkohemi këtij nderimi e kësaj përulje për ata që sakrifikuan për liri, lavdi”, tha Haradinaj.

Në fund të pranishmit kanë vendosur lule mbi varrezat e martirëve që janë vrar ë në këtë fshat.

Të pranishmit në fund të ceremonisë vendosën lule mbi varrezat e dëshmorëve të vrarë në këtë fshat më 2 maj të vitit 1999 janë vrarë 116 civilë.

​17 vjet nga masakra e Studimes së Vushtrrisë

Janë bërë 17 vjet që nga koha kur në Studime të Vushtrrisë forcat serbe vranë 116 persona civilë.

Këta të fundit u nxorën nga kolona e qindra njerëzve që kishin marrë rrugë për Shqipëri.

Nga dëshmitarët mësohet se 116 civilët u pushkatuan brenda dy orëve.

Familjarë dhe qytetarë të tjerë kujtojnë çdo vit këto viktima, e ashtu do ndodh edhe këtë vit.

Për t’i nderuar viktimat do të jetë në Studime sot edhe presidenti i vendit Hashim Thaçi. Ky i fundit do të mbajë edhe një fjalim.

Sot mund të lexoni Shfletoni kopertinat