Veseli: Ilaz Kodra, krah i djathtë i Komandantit Legjendar

Kosova

Veseli: Ilaz Kodra, krah i djathtë i Komandantit Legjendar

Më: 29 prill 2016 Në ora: 16:47

Kryetari i Kuvendit, Kadri Veseli, mori pjesë në Akademinë Përkujtimore, e cila u mbajt në Prishtinë, në nderim të figurës së Komandantit Ilaz Kodra, me rastin e 17-vjetorin e rënies heroike të tij.

Kryetari i Kuvendit, Kadri Veseli, mori pjesë në Akademinë Përkujtimore, e cila u mbajt sot në Prishtinë, në nderim të figurës së Komandantit Ilaz Kodra, me rastin e 17-vjetorin e rënies heroike të tij.

Në fjalën e tij para të pranishmëve, kryeparlamentari Veseli vlerësoi lart figurën e Komandantit Ilaz Kodra dhe veprën heroike të tij, në shërbim të kombit e të atdheut.

Duke e konsideruar atë një nga pjesëtarët e orëve të para të Ushtrisë Çlirimtare të Kosovës dhe të luftës aktive për çlirim, Veseli tha se emri i Ilaz Kodrës lidhet me çdo veprim dhe vendim të karakterit çlirimtar gjatë periudhës së viteve të ‘90-ta.

“Ilaz Kodra ishte krah i djathtë i Komandantit Legjendar Adem Jashari dhe aksionisti i parë i Ushtrisë Çlirimtare të Kosovës. Jo rastësisht, Ilaz Kodra ishte pjesëtar dhe komandant i Brigadës 114, në krye të të cilës, paraprakisht, ishte njëri nga tribunët më të mëdhenj të kombit tonë, komandanti Fehmi Lladrofci”, theksoi kryetari Veseli.

Duke iu drejtuar dy vajzave të heroit Ilaz Kodra, të cilat ishin të pranishme në sallë, Veseli tha se ato duhet të ndihen krenare për veprën e babait të tyre dhe trashëgimin që ai ua la.

Kryetari i Kuvendit tha se institucionet e Republikës së Kosovës janë të obliguara të angazhohen edhe më shumë për zhvillimin e vendit, duke çuar kështu përpara amanetin e dëshmorëve.

“Sot, Kosova nuk ballafaqohet me rrezikun e ndonjë pushtimi, sepse Serbia, falë këtij gjaku, është larguar njëherë e përgjithmonë nga vendi ynë. Por, kemi sfida të reja të cilat lidhen me zhvillimin e vendit dhe perspektivën e tij, për të cilën shumë vajza dhe djem, gra e burra, sakrifikuan jetën e tyre”, theksoi ndër të tjera kryeparlamentari Veseli.

Sot mund të lexoni Shfletoni kopertinat