Ambasadori britanik O’Connell: Jam i tmerruar me skenat e sotme në Kuvend

Kosova

Ambasadori britanik O’Connell: Jam i tmerruar me skenat e sotme në Kuvend

Më: 8 tetor 2015 Në ora: 17:41

“Unë jam i tmerruar me skenat e sotme në Kuvend. Kjo ishte dhunë. Dhuna nuk ka vend në demokraci. Unë iu kam shmangur komentimit të bllokadës së vazhdueshme politike në Kuvend, sepse besoj se populli i Kosovës - të cilët luftuan me vite për të ndërtuar diçka të veçantë në Kosovë, mund dhe duhet patjetër të marrë përgjegjësinë për fatin e vet politik”, deklaron ambasadori britanik Ruairi O’Connell në deklaratën e tij pas ngjarjeve në Kuvend.

“Por, ngjarjet e ditës së sotme shkojnë përtej çdo standardi të demokracisë. Unë nuk mund të besoj se populli i Kosovës ka dëshiruar diçka të tillë kur kundërshtonin shtypjen, apo kur ata punonin me bashkësinë ndërkombëtare për të ndërtuar një Kosovë të re. Jam i shqetësuar nga përdorimi i dhunës, veçanërisht brenda Kuvendit”, pohon ai.

Ai pohon se Kosova përballet me shumë sfida, por që duhet gjetur zgjidhjen për to. “Është në interesin tonë të përbashkët, Britanisë dhe Kosovës, për t’i adresuar këto sfida. Por a ndihmojnë këto veprime në përmirësimin e sektorit të drejtësisë? A merren ato me problemin shumë real të korrupsionit dhe shpërdorimit të institucioneve shtetërore? A ndihmojnë ato për të tërhequr investitorë dhe për të krijuar vende pune? A e ndihmojnë Kosovën të fitojë njohje ndërkombëtare? Unë mendoj se jo. Kështu që, unë ju bëjë thirrje partive opozitare që të përmbahen nga dhuna dhe të respektojnë institucionet për krijimin e të cilave ato vet u sakrifikuan”, thotë në deklaratën e tij shkëlqesia.

Sot mund të lexoni Shfletoni kopertinat