Ismaili: Gjykata, temë dominuese në takimet me zyrtarët amerikanë

Kosova

Ismaili: Gjykata, temë dominuese në takimet me zyrtarët amerikanë

Më: 29 korrik 2015 Në ora: 22:15

3-4 vitet e fundit Kosova është përballur me një sërë sfidash të brendshme dhe të jashtme, si njohjet e mëtejshme të shtetit të Kosovës, që deri tani janë mbi 100, proceset e integrimit në Bashkimin Europian, bisedimet me Serbinë për normalizimin e marrëdhënieve, anëtarësimi në organizatat ndërkombëtare, përpjekjet kundër atyre që u janë bashkuar radhëve të grupit ISIS, dhe së fundi, çështja më e nxehtë e këtyre kohëve krijimi i Gjykatës Speciale.

Në këto vite me shumë ngjarje, Kosova ka patur përfaqësues të sajin në Uashington, ambasadorin Akan Ismaili.

Në një intervistë për Zërin e Amerikës në ditët e fundit të detyrës së tij, (mandati përfundon më 31 korrik), ambasadori Ismaili thotë se çështja e Gjykatës Speciale “dominon të gjitha bisedat dhe komunikimet e diplomatëve kosovarë me zyrtarët e administratës amerikane”.

Ambasador Ismaili tha se në takimet e përbashkëta është bërë e qartë, se ngritja e Gjykatës është një çështje shumë e rëndësishme për administratën amerikane, për Departamentin e Shtetit, por edhe për organizma të tjera ndërkombëtare.

“Është një çështje e vështirë, ata e kuptojnë kompleksitetin e situatës, peshën e saj, por kërkojnë prej nesh që të gjejmë forcën për gjetjen e një zgjidhjeje ndaj kësaj situate”, - tha ambasadori i Kosovës në Uashington.

Ismaili tha se ka shpresa për zgjidhjen e kësaj çështjeje në seancën e javës së ardhshme të Parlamentit të Kosovës, që, siç u shpreh ai “t’i jepet fund një teme shumë të vështirë për vendin, por që ndihmon shumë në raportet e Kosovës me partnerë ndërkombëtarë”.

Lidhur me pjesëmarrjen e shtetasve të Kosovës në radhët e ISIS-it, ambasadori Ismaili tha se kjo çështje është një fenomen global dhe se asaj nuk ka mundur t’i shpëtojë as Ballkani.

Ai tha se numri i pjesëmarrësve ka qenë befasues edhe për qytetarët e Kosovës, por në anën tjetër, reagimi i qeverisë së Prishtinës dhe bashkëpunimi me institucionet amerikane është vlerësuar gjatë takimeve të përbashkëta.

Ambasadori Ismaili do të kthehet tani në sektorin privat, aty ku ishte para se të fillonte punën për qeverinë e Kosovës./VOA/

Sot mund të lexoni Shfletoni kopertinat