Thaçi: Gjykata Speciale – javën e ardhshme

Kosova

Thaçi: Gjykata Speciale – javën e ardhshme

Më: 29 korrik 2015 Në ora: 11:56

(E plotësuar) Zëvendëskryeministri i Kosovës, Hashim Thaçi, tha të mërkurën se Parlamenti i Kosovës pritet të votojë javën e ardhshme ndryshimet kushtetuese që mundësojnë ngritjen e Gjykatës së Posaçme, që do të trajtojë pretendimet për krime lufte. Zoti Thaçi, që drejton Partinë Demokratike, mblodhi sot grupin parlamentar të kësaj partie për të diskutuar këtë çështje pas dështimit të parlamentit më 26 qershor që të miratojë ndryshimet kushtetuese. Ishin 13 deputetë të Partisë Demokratike që votuan kundër, abstenuan, apo nuk morën fare pjesë në seancën e 26 qershorit, e cila nxiti shtimin e trysnisë ndërkombëtare për gjetjen e rrugëve për votimin e serishëm të ndryshimeve kushtetuese.

Kryetari i Partisë Demokratike, Hashim Thaçi, tha se ishte rekomandim i grupit të tij që kjo çështje të hidhet në parlament javën e ardhshme.

“Kjo është në interesin e politikës së Kosovës, në interesin e institucioneve të vendit, në interesin e shoqërisë kosovare, në interesin e perspektivës euroatlantike. Por, natyrisht se është edhe në interesin e së kaluarës edhe të së ardhmes së shtetit të Kosovës dhe vazhdimësisë së thellimit të partneritetit me Bashkimin Evropian, me NATO-n dhe Shtetet e Bashkuara të Amerikës. Ne ndajmë vlera të njëjta, ndajmë interesa të njëjta dhe kjo gjë do të ndodhë në javën e ardhshme”, tha zoti Thaçi.

Ideja për themelimin e gjykatës pasoi hetimet e pretendimeve të të dërguarit të Këshillit të Evropës Dick Martty për trafikim organesh në Kosovë, përkatësisht përfshirjen e disa prej ish-drejtuesve të Ushtrisë Çlirimtare të Kosovës, në krime të luftës. Hetimet kishin nxitur reagime dhe protesta ne Kosovë, ku pohohet se në këtë mënyrë po bëhet barazimi me mizoritë e forcave serbe gjatë luftës së viteve 1998 1999.

Opozita po bënë thirrje që të respektohet vendimi i deputetëve të parlamentit dhe të hiqet dorë nga themelimi i saj në formën si është ofruar aktualisht. Udhëheqësit e saj thonë se nuk janë kundër një gjykate për krime lufte, por kërkojnë që ajo të jetë gjithëpërfshirëse, ndërsa janë duke diskutuar rrugët e siç thuhet, pengimit të votimit të serishëm që sipas tyre do të dëmtojë rëndë demokracinë në vend.

Zyrtarët perëndimorë pohojnë se Gjykata do të ndihmojë heqjen e reve të zeza mbi Kosovën. Ata thonë po ashtu se dështimi i Kosovës për të ngritur gjykatën mund të çojë çështjen në Këshillin e Sigurimit të Kombeve të Bashkuara dhe kjo do të jetë e dëmshme për shtetin e ri.

Votimi i ndryshimeve kushtetuese kërkon dy të tretat e votave të të gjithë deputetëve si dhe dy të tretat e votave të deputetëve nga radhët e pakicave kombëtare.

Takohen deputetët e PDK-së

Grupi Parlamentar i Partisë Demokratike të Kosovës ka filluar të mblidhet në Kuvendin e Kosovës. Edhe pse jo zyrtarisht, mësohet se ky është takimi i fundit para se Qeveria të sjell në Kuvend, ndryshimet kushtetuese që i hapin rrugë Gjykatës Speciale. Një takim i tillë pritet të ndodhë nesër edhe në Grupin Parlamentar të LDK-së.

Takimi ishte paraparë të ndodhte dje, megjithatë në momentin e fundit është shtyrë për sot. Deputetët thotë se është një takim i zakontë para seancës së nesërme. Megjithatë, burime të KosovaPress-it thonë se ky është takimi i dytë me radhë i kryetarit të partisë, Hashim Thaçi me deputetët për t’u siguruar se ata do të përkrahin Gjykatën Speciale. /Kosovapress/

Sot mund të lexoni Shfletoni kopertinat