Grupi Parlamentar i Aleancës për Ardhmërinë e Kosovës (AAK), i udhëhequr nga kryetarja e grupit, Donika Kadaj-Bujupi, ka nisur sot agjendën e vizitës nëpër komuna të Kosovës.
Temë qendrore e kësaj agjende vizitash është ngritja e prioriteteve të qytetarëve të vendit para rishqyrtimit të buxhetit nga Kuvendi i Kosovës.
Kadaj-Bujupi dhe deputetët e Aleancës kanë vizituar në këtë kuadër Komunën e Obiliqit, të Lypjanit dhe atë të Shtimjes.
Në Komunën e Obiliqit ata janë pritur nga kryetari i Komunës, Xhafer Gashi, nga drejtorët komunalë dhe asambleistët e AK të Obiliqit.
Ndërsa në Komunën e Lypjanit janë takuar me Nënkryetarin e Komunës, Fitim Selimi, drejtorët komunalë dhe asamblistë të shumtë.
Temë në këto takime ishte mundësia e bashkëpunimit në nivelin lokal dhe atë qendror, investimet nëpër sektorë të ndryshëm, rishikimi i buxhetit nga Kuvendi i Kosovës dhe investimet e parapara për projekte konkrete nëpër komuna.
Është diskutuara edhe për angazhimin e deputetëve të AAK-së nëpër komisionet përkatëse, për t'i shtyrë përpara projektet e rëndësishme që shkojnë në favor të përmirësimit të jetës së qytetarëve të vendit.
U konkludua se buxheti i Republikës se Kosovës, si instrument kryesor i aksionit ekonomik të qeverisë, nuk duhet trajtuar si pronë që i takon qeverisë dhe nuk duhet të shpërndahet, bazuar në agjendat dhe prioritetet e pushtetit, por sipas interesit të qytetarit dhe kriterit të kthimit të taksave tek qytetarët, sipas kontributit dhe nevojës.
