Sot në tërë Kosovën fillon aksioni i pastrimi të bërllokut të organizuar nga inciativa “Ta pastrojmë Kosovën”, në të cilin synohet pastrimi i 351 deponive të evidentuara.
Aksionit pritet t’i bashkohen edhe shumica e institucioneve qëndrore dhe lokale në Kosovë.
Në kuadër të iniciativës “Ta pastrojmë Kosovën”, komuna e Prishtinës dhe OJQ “Green Art Center Prishtina” (GAC), kanë marrë përsipër koordinimin e aktiviteteve për ta pastruar kryeqytetin dhe liqenin e Badovcit.
Sipas një njoftimi të komunës së Prishtinës thuhet se këtyre aktiviteteve u janë bashkëngjitur qindra vullnetarë nga institucione, OJQ dhe kompani të ndryshme.
Aksioni “Ta Pastrojmë Kosovën”, në Komunën e Prishtinës do të fillojë në deponinë ilegale, e cila ndodhet në lagjen "Arbëria 3", në ora 10:00.
Nisja e 200 nxënësve në mënyrë të organizuar për në lagjen Arbëria 3 do të bëhet në ora 9:30 me autobus nga Sheshi “Zahir Pajaziti”.
Po ashtu, në shumicën e shkollave fillore të Prishtinës do të ketë aktivitete pastrimi nga nxënësit e shkollave.
Ndërkohë dje, Klina i ka paraprirë këtij aksioni, kanë marrë pjesë nxënësit e të gjitha shkollave të Klinës, qytetarë vullnetarë, si dhe punëtorët e komunës.
Në fokus, përveç pastrimit të rrugëve të qytetit dhe hapësirave përreth shkollave, kanë qenë fshatrat Sërrkë, Dush dhe Volljakë.
Edhe kryeministri i Kosovës Isa Mustafa e përkrah aksionin “Ta pastrojmë Kosovën”. Në Facebook-un e tij ai e ka postuar një shkrim ku bën thirrje që të pastrohet shteti.
“Nesër Kosova meriton të duket më e pastër, më e rregulluar. Rrugët, trotuaret, deponitë ilegale të mbeturinave, janë hapësira tona. Ato pasqyrojnë kujdesin tonë; kulturën dhe edukatën tonë. Të mos bëjmë asgjë më shumë, veç të pastrojmë ambientet publike, ashtu si e mbajmë shtëpinë tonë. Të organizohemi të gjithë, të përkrahim aksionin “Ta Pastrojmë Kosovën”.
Ndryshe, iniciativa ta pastrojmë Kosovën ka kohë që ka filluar pastrimin nëpër komuna.
