Kryetari i komunës, Agim Bahtiri, priti Ilian Goodman, zyrtar i lartë i Departamentit Amerikan për Kosovën, Scot Lang zyrtar i ambasadës amerikane në Prishtinë, Marisa Cohrs, zyrtar politik i ambasadës amerikane, që shoqëroheshin nga Agron Ramaj dhe Ana Shariq, këshilltarë politik në këtë ambasadë.
Kryetari Bahtiri i njoftoi zyrtarët amerikanë lidhur me angazhimin për të krijuar stabilitet, ambient të sigurt, lëvizje të lirë dhe për të hap rrugën për zhvillim ekonomik dhe thithjen e investimeve në qytetin e Mitrovicës.
"Vizioni im është krijimi i stabilitetit dhe sigurisë në Mitrovicë, mbyllja e rrugëve të krimit, korrupsionit dhe incidenteve, sigurimi i ambientit të sigurt për investime, nxitjen e zhvillimit ekonomik dhe hapjen e perspektivës së qytetarëve për jetë më të mirë", tha kryetari Bahtiri.
Në vazhdim kryetari Bahtiri i njoftoi zyrtarët e Departamentit lidhur me punën që është bërë në uljen e tensioneve, për takimet dhe bashkëpunimin me kryetarin Rakiq, posaçërisht për takimet e grupeve punuese për rindërtimin e shtëpive dhe kthimin në to, por edhe për aktivitetet e përbashkëta rreth kërkimit të të riut shqiptar që u mbyt në Ibër ditë më parë, si dhe i njoftoi lidhur me projektet e përbashkëta të të dyja komunave në të ardhmen.
Goodman falënderoi për takimin dhe informacionet që i duhen për të plotësuar mozaikun e gjendjes në Mitrovicë dhe Kosovë. Ai tha se është këtu për të shikuar mundësitë e mbështetjes në proceset në vazhdim, ndërkohë që e inkurajoi kryetarin Bahtiri për vazhdimin e takimeve me Rakiqin, të grupeve punuese për kthim, bisedat rreth gjetjes së modaliteteve për shtensionimin e gjendjes rreth urës kryesore mbi lumin Ibër, si dhe nxitjen e investimeve dhe projekteve të përbashkëta etj.
Bahtiri po ashtu i ka njoftuar amerikanët se së shpejti do realizohen dy projekte të përbashkëta, njëri është ai për ndërtimin e një rruge në gjatësi 1,5 kilometra, ku do të investojnë së bashku dy komunat.
“Ne kemi bashkëpunimin edhe në fushën e menaxhimit të mbeturinave, ku kemi nënshkruar kontratën shumëmilionëshe për ndërtimin e fabrikës së riciklimit të mbeturinave ne kompaninë amerikane "Green Power", që do përmirësoj dukshëm gjendjen, do prodhohet energji elektrike dhe sigurohet riciklimi në periudha afatgjate”.