Kryeministri Mustafa, në takimin e nëntë të Këshillit Kombëtar për Integrim Evropian ka thënë sot se qeveria është duke punuar në përmbushjen e kritereve në procesin e liberalizimit të vizave.
Kryeministri Isa Mustafa, në takimin e nëntë të Këshillit Kombëtar për Integrim Evropian, të drejtuar nga presidentja e Republikës, Atifete Jahjaga, ka thënë sot se qeveria është duke punuar në përmbushjen e kritereve të mbetura paplotësuara në procesin e liberalizimit të vizave.
Mustafa, në këtë takim, ku ishin pjesëmarrës edhe anëtarë të tjerë të kabinetit të tij, e po ashtu edhe përfaqësuesi i Bashkimit Evropian në Kosovë, Samuel Zbogar, ka thënë se ka pasur progres në procesin e liberalizmit të vizave, porse siç ka thënë ai, ekziston edhe vetëdijesimi se ka ende kritere të parealizuara.
“Jemi të vetëdijshëm se kemi kritere të parealizuara për të cilat institucionet e Kosovës janë zotuar se do t’i përmbushin deri më 15 maj, dhe në fund të atij muaji do të dorëzojmë raportin”, ka thënë kryeministri.
“Institucionet e Kosovës do të bëjnë të pamundurën që t’i përmbushin kriteret e paplotësuara për liberalizimin e vizave, porse edhe Bashkimi Evropian nuk duhet të lejojë që qytetarët kosovarë të mbeten edhe për një kohë në geto”, ka thënë ndër të tjera kryeministri Mustafa.