​Nis impianti për pastrimin e ujërave të zeza në Prishtinë

Kosova

​Nis impianti për pastrimin e ujërave të zeza në Prishtinë

Më: 28 prill 2015 Në ora: 13:45

Banorëve të Prishtinës, atyre të komunës së Graçanicës dhe fshatrave tjera përreth që furnizohen me ujë nga Liqeni i Badovcit, do të iu ofrohet një ujë sa më i pastër e sigurt për pije. Krejt kjo falë ndërtimit të një impianti që do të bëhet për pastrimin e ujërave të zeza, gurthëmeli i të cilit u vë sot në Liqenin e Badovcit.

Përmes këtij impianti do të bëhet pastrimi i ujërave të zeza që deri më tani janë derdhur në Liqenin e Badovcit. Ky projekt vjen donacion nga Republika Çeke në bashkëpunim dhe Komunën e Prishtinës dhe Ministrinë e Mjedisit dhe Planifikimit Hapësinor.

Pritet që rrjeti i kanalizimit të përfundojë shumica këtë vit, derisa në gjysmën e dytë të vitit të ardhshëm pritet të përfundoj impianti në tërësi. Krejt ky projekt arrin shumën prej 1 milion e gjysmë euro.

Përfaqësues të Republikës Çeke, të Qeverisë së Kosovës, të Komunës së Prishtinës, të Ujësjellësit “Prishtina” e banorë të fshatrave përreth u mblodhën sot në Liqenin e Badovcit për të vënë gurëthemelin e këtij projekti. Protagonistët e këtij projekti e vlerësuan lartë nisjen e punimeve drejtë ndërtimit të këtij impianti. Sipas tyre, në këtë mënyrë, tek qytetarët do të arrijë një ujë sa më i sigurt për pije.

Ministri i Mjedisit dhe Planifikimit Hapësinor, Ferid Agani tha se ky bashkëpunim është shpresë që edhe në të ardhmen, problemet e shumta mjedisore me të cilat ballafaqohet Kosova, do të adresohen më mënyrë gjithëpërfshirëse.

“Rëndësia e këtij projekti është e shumëfishtë edhe në aspektin e drejtpërdrejtë të sigurimit të ujit cilësor të pijes të Liqenit të Badovcit. Me këtë projekt do të arrijmë që ujërat e zeza të shndërrohen praktikisht në ujëra të cilat nuk do të përmbajnë asnjë materie helmuese për jetën e gjallë në Liqenin e Badovcit dhe për ujin e pijes që ne e marrim nga ky liqe. Për më tutje, ky impiant dhe ky projekt do të ndihmojë që vetëdijesimi i qytetarëve, banorëve të kësaj ane të rritet në shkallën më të lartë, për rëndësinë e mjedisit”

Sipas Aganit, ky projekt është një dëshmi se edhe institucionet qendrore edhe ato lokale, edhe vet komuniteti dhe banorët janë të vetëdijshëm për këtë rëndësi. Ai u zotua se do të vazhdojnë të mbështesin projekte të tilla.

E kryetari i Prishtinës, Shpend Ahmeti tha se presin që në këtë mënyrë do të përmirësohet cilësia e ujit për qytetarët.

“Për neve është shumë më rëndësi që kanalizimet, apo ujërat e zeza, të cilat kanë ardhë në Liqenin Badovc, të trajtohen, dhe ky projekt tashmë nuk eshët që siguron ujë të pijshëm për Prishtinën, megjithatë e bënë më të lehtë procesin e pastrimit të ujit për shkak se ne do ta pastrojmë në këtë vend, ujin që vjen prej tre fshatrave, Mramor, Busi, Sutjeskë, dhe do ta lehtësojë bukur shumë punën e ujësjellësit dhe do ta përmirësojë cilësinë e ujit të cilin ne e marrim në Komunën e Prishtinës.

Ai bëri tè ditur se ky projekt arrin vlerën e 1 milionë e gjysmë euro. I pari i Prishtinës bëri të ditur se rreth 700 mijë euro do të kushtojë impianti i cili ndërtohet këtu që do t’i trajtojë ujërat e zeza e që financohet nga Qeveria Çeke dhe 800 mijë euro Komuna E Prishtinës do të ndërtojë 22 km kanalizim.

Menaxhimin e këtij impianti, pas ndërtimit, do ta marrë Ujësjellësi “Prishtina”.

Drejtori, Gjelosh Vataj ua kujtoi qytetarëve se edhe deri tani ujin e kanë pas të sigurt.

“Mos të harroj të sigurojë qytetarët që edhe deri sot ujin e kanë pasë të pijshëm,. Uji ka qenë shumë i sigurt por kjo neve na siguron edhe na lehtëson punën që të arrijë uji sa më i mirë tek qytetarët”, tha ai.

Ndërsa, ambasadori i Republikës Çeke, Ivo Silhavy tha se përmes këtij projekti duan të ndihmojnë kosovarët drejtë përmirësimit të cilësisë së jetesës.

“Do të doja t’i thoja dy gjëra që janë shumë më rëndësi, jo vetëm për këtë projekt: se pari u tha që përfitues është kompania regjionale e ujit ‘Prishtina’ natyrisht, por nga këndvështrimi im, përfitues janë kosovarët e zakonshëm, të Prishtinës, Graçanices dhe të këtij rajoni. Këta kosovarë të zakonshëm janë njerëzit të cilët ne duam t’i ndihmojmë për të përmirësuar cilësinë e jetës, gjendjen shëndetësore dhe ambientin në përgjithësi”, tha ai.

I pranishëm në vënien e gurëthemelit të këtij projekti ishte edhe kryetari i Komunës së Graçanicës, Vladeta Kostiq.

Ai falënderoj Republikën Çeke, që siç tha ai e ka kuptuar se cili është një nga problemet më të mëdha me të cilin ballafaqohet populli në Kosovë.

“Projekti si ky, më të cilin ky ujë që do të duhet të pastrohet dhe të derdhen në liqenin e Graçanicës, ndoshta nuk është i mirë për fotografime elektorale, për shkak se nuk është mbi tokë, por gjithsesi në afat të gjatë kthehet përmes shëndetit të të gjithë neve që e përdorim këtë ujë. Unë jam këtu si fqinj i qytetit të Prishtinës dhe sinqerisht shpresoj se edhe Qeveria, si dhe Qeveria Çeke dhe donatorët tjerë të huaj, do të njohin këtë problem dhe se projekte të këtilla do të ketë edhe më shumë në të gjitha komunat, duke pasur parasysh se ka ardhur koha që në këto hapësira ujërat e zeza të bëhen ujëra të kthjellët dhe që njëherë të nisin ujërat e kthjellët, në çdo kuptim të kësaj fjale, po edhe në atë politik”, tha ai.

Projekti për ndërtimin e impiantit përmes së cilit do të bëhet pastrimi i ujërave të zeza që deri tani janë derdhur në Liqenin e Badovcit, gurëthemeli i të cilit është vënë sot pritet të përfundojë në një afat mjaftë të shkurtë. Gjysma e dytë e vitit të ardhshëm pritet ta gjejë të përfunduar.

Sot mund të lexoni Shfletoni kopertinat