Ngjarja e paralajmëruar nga një grup individësh për ditën e nesërme, e quajtur sipas tyre “Dita e Kanabisit”, parashihet të zhvillohet nesër në Parkun e Gërmisë, në Prishtinë.
Lidhur me këtë ngjarje ka reaguar Policia e Kosovës, e cila ka dalë me një plan operativ për ndaljen e këtij eventi, që sipas tyre është i jashtëligjshëm.
Ajo thotë se nuk do ta tolerojë asnjë individ që për arsye personale apo kolektive do ta bëjë konsumimin e kanabisit.
“Njoftojmë të gjithë ata individë apo grupe që bien ndesh me ligjin do të përballen me masat sanksionuese që parashihen në ligjet e aplikueshme”, ka thënë për Indeksonline zëdhënësi i Policisë së Kosovës, Daut Hoxha.
Policia, gjithashtu, ka bërë të ditur se është në dijeni për organizimin e këtij eventi dhe gjatë ditës së nesërme do të jetë në aksion në rast të konsumimit të lënmdëve narkotike.
“Blerja, posedimi, shpërndarja e pautorizuar e narkotikëve, substancave psikotrope dhe analoge është vepër penale e sanksionuar me ligj, prandaj PK-ja në vazhdimësi ka ndërmarrë dhe do të vazhdojë me aksione për parandalimin e këtyre dukurive”, ka shtuar Hoxha.
“Share/Love - 4/20 Prishtina” është emri i eventit të krijuar në Facebook, i cili përshkruan ngjarjen që jozyrtarisht njihet si “Dita Ndërkombëtare e Kanabisit”.
Ardhjen në këtë event e kishin konfirmuar rreth pesë mijë persona.
Ndryshe, termi 4/20 për herë të parë është përdorur në San Rafael, Kaliforni të SHBA-ve, në vitin 1971. Një grup njerëzish në San Rafael asokohe kanë pasur në plan që të kërkojnë për disa bimë kanabisi, për të cilët ata kishin dëgjuar.