Kryetarja e grupit parlamentar të AAK-së,Donika Kadaj Bujupi, e ka krahasuar me vendimet e regjimit të Millosheviqit, largimin e sotëm nga puna të kryesindikalistit të RTK-së, Fadil Hoxha, dhe redaktorit e zëvendësit të kësaj Sindikate, Arsim Halili.
“Është marrë një vendim arbitrar, me i largu prej pune pa asnjë informatë apo paralajmërim, por vetëm pse kanë denoncuar keqmneaxhmin aty”, ka thënë deputetja Kadaj Bujupi. “Kjo po ma kujton kohën kur RTP-ja është mbyllur nga regjimi”, ka thënë ajo.
Ajo ka thënë se politika duhet të qëndrojë larg nga mediat, por ajo ka thënë se Kuvendi i Kosovës, si themelues i RTK-së nuk mundet të rri duarkryq në shkeljen e vazhdueshme të etikës dhe parimeve.
Grupi Parlamentar i AAK-së e kishte paralajmëruar më parë se do të kërkojë ngritjen e një Komisioni Hetimor, ndërsa Kadaj –Bujupi tha se është për keqardhje se vendimi për largimin e tyre nga puna u bë vetëm pak kohë para se të nis kjo pikë e rendit të ditës.
“AAK mendon se është momenti i fundit kur Kuvendi duhet të ndërhyjë për të ndalur të keqen që ka kapluar RTK-në, duke ditur se është edhe financuese e këtij institucioni. Ky grup hetimor duhet që të zbardh edhe dyshimet për keqpërdorime të parasë publike, për punësimet familjare, për censurën, e të tjera”, ka thënë Kadaj - Bujupi.
Deputeti i LDK-së, Ali Sadria, ka thënë se grupi parlamentar të cilit i takon nuk e përkrah themelimin e komisionit hetimor, sepse sipas tij, ky është një proces që zgjat shumë, ndërsa ai ka thënë se gjendja në RTK është më alarmante se kaq.