Projektligji për Gjykatën Speciale së shpejti do të shkoj për votim në Kuvendin e Kosovës. Tashmë dihet kjo Gjykatë do ta ketë në mandatin e saj hetimin e krimeve të UÇK-së të pretenduara në raportin e senatorit zviceran Dik Marti. Mirëpo, gjatë procedimit në Kuvend ka shumë kërkesa që ky projektligj të amendamentohet. Kështu, deputetët po kërkojnë që në këtë gjykatë të hetohen edhe vrasjet e pretenduara si politike, e po ashtu që Gjykata t`i hetoj edhe krimet e luftës të kryera nga serbët në Kosovë.
Profesori i marrëdhënieve ndërkombëtare, Afrim Hoti, thotë se Gjykata Speciale duhet t`i trajtoj krimet e luftës pa asnjë përjashtim.
“Unë mendoj se Gjykata Speciale duhet të trajtoj krimet e luftës pa përjashtim ndonëse do të ishte e paprecedencë të trajtoheshin krimet mbi kriterin e përkatësisë etnike”, thotë Hoti për “Bota sot”.
Pavarësisht kësaj, Gjykata Speciale pritet t`i trajtoj dhjetë raste të krimeve të pretenduara se janë kryer gjatë luftës.
Krimet që do të hetohen sipas raportit prokurorit Williamson janë: Krimet për vrasje të motivuara etnikisht, vrasje politike, vrasje të ish bashkëpunëtorëve të regjimit, frikësim, dëbim, dhunë seksuale dhe shkatërrim të monumenteve të trashëgimisë kulturore në Kosovë.