VV: Ja dështimet dhe keqpërdorimet e përvitshme të Nexhat Demakut

Kosova

VV: Ja dështimet dhe keqpërdorimet e përvitshme të Nexhat Demakut

Më: 6 mars 2015 Në ora: 10:17

Lëvizja Vetëvendosje ka akuzuar kryetarin e komunës së Drenasit, Nexhat Demaku lidhur me keqpërdorimet e përvitshme.
Në një komunikatë për media, Vetëvendosje thekson se në vitin e kaluar shumë kërkesa të qytetarëve dhe organizatave të ndryshme për investime publike janë refuzuar nga drejtuesit e Komunës së Drenasit me arsyetimin se ka mungesë të buxhetit.

“Mirëpo, raporti i kryetarit për vitin e kaluar tregon që Komuna nuk i ka shpenzuar rreth 600 mijë euro nga granti qeveritar dhe 200 mijë euro të tjera nga të hyrat vetanake. Ky suficit që kap vlerën e 800 mijë euro është mundësi e humbur për të përmirësuar infrastrukturën dhe shërbimet publike në Komunën tonë. Suficiti i lartë buxhetor i vitit të kaluar e ka rikonfirmuar edhe një herë mungesën e vullnetit dhe aftësisë menaxheriale tek zyrtarët komunalë. Sikur t’i kishin këto dy tipare Kryetari i Komunës dhe ekipi i tij, do të kishim një gjendje shumë më të mirë në arsim, shëndetësi, bujqësi dhe në fusha të tjera”, thuhet në komunikatë.

Sipas Vetëvendosjes, kryetari i Komunës dhe drejtorët e tij e kanë humbur të drejtën që të arsyetohen për mungesë të buxhetit, ndërsa qytetarët kanë të drejtë të ankohen për mos shpenzimin e parasë publike për nevojat e tyre.

Sipas VV-së, raporti financiar tregon që zyrtarët komunalë janë kujdesur mirë për ta shpenzuar maksimalisht buxhetin për mallra dhe shërbime publike, gjë që nuk ka ndodhur në kategorinë ekonomike, atë të investimeve kapitale. Në kategorinë mallra dhe shërbime publike kemi vërejtur shpenzime enorme për darka zyrtare, karburant dhe telefon.

“Shpenzimi i 18,500 euro për darka zyrtare, 23,300 euro për telefon dhe 46,300 për derivate është luks i tepruar i zyrtarëve komunalë që udhëheqin një Komunë me qytetarë të varfër. Shpenzimi i këtyre parave nuk është bërë për të rritur përformancën e organeve komunale sepse defektet dhe mangësitë e shumta ishin evidente në çdo sektor”, thuhet në komunikatë.

Sipas lëvizjes Vetëvendosje, dështimet dhe keqpërdorimet e Komunës së Drenasit që përsëritën në secilin vit, po ua humbin shpresën qytetarëve për një jetë më të mirë.

Sot mund të lexoni Shfletoni kopertinat