Këshilli Prokurorial i Kosovës ka marrë vendim që dosjen e procesit të zgjedhjes së Kryeprokurorit të Shtetit, të plotë, t’ia dërgojnë Gjykatës Kushtetuese. Në mbledhjen e jashtëzakonshme, mbajtur të martën, pesë nga anëtarët e Këshillit kanë votuar për dërgimin e kësaj dosjeje, kurse dy kanë votuar kundër.
Vendimi i KPK-së vjen pas letrës që Kushtetuesja ia ka dërguar këtij institucioni, ku kërkohet dorëzimi i kopjes së tërë dosjes së procedurave të ndjekura. Në të kundërtën është thënë se mund të lëshohet një aktvendim në të cilin do të theksohet se nuk është zbatuar aktgjykimi i Kushtetueses.
Disa nga anëtarët e KPK-së e kanë cilësuar si kërcënuese gjuhën e përdorur në këtë kërkesë nga Kushtetuesja. Dy anëtarët, të cilët kanë votuar kundër, Sevdije Morina e Idain Ismajli, kanë vlerësuar se kështu po ndërhyhet në pavarësinë e sistemit prokurorial, për më shumë që ky është proces i ri dhe, sipas tyre, nuk është pjesë e aktgjykimit të vitit të kaluar.
Fillimisht, ushtruesi i detyrës së Kryeprokurorit, Sylë Hoxha, ka thënë se janë të obliguar që të gjitha shkresat lidhur me procesin e emërimit të Kryeprokurorit të Shtetit duhet t`i dërgohen Gjykatës Kushtetuese në formë të shkruar.