Inspektorët komunalë të trafikut kanë dalë sot nëpër Prishtinë, ku kanë kontrolluar për dokumente shoferët e linjave të trafikut urban, taksistët ilegalë por dhe ata legalë.
Shoferët e autobusëve të linjave të rregullta të trafikut urban, të cilët nuk e kishin dokumentacionin në rregull, nuk kanë shpëtuar pa gjoba.
Por, taksistët ilegalë në Prishtinë e kanë pësuar edhe më keq. Si raporton Klan Kosova, ata përveç se janë gjobitur, disa prej tyre u është konfiskuar edhe vetura.
Drejtor i Shërbimeve Publike në Komunën e Prishtinës, Ardian Gashi tha se ky aksion i kontrollit ka ardhur si pasojë e ankesave të shumta të qytetarëve të Prishtinës lidhur me veprimtarinë ilegale të taksive por dhe të autobusëve.
“Inspeksioni do të vazhdojë punën sa i përket kontrolleve të këtyre linjave. U sugjeroj të gjithë atyre që merren me punë ilegale që mos ta bëjnë një gjë të tillë sepse do të ndiqen nga ligji”, tha Gashi për Klan Kosova.