Qendra e Lëvizjes VV në Therandë përmes këshilltarit komunal Leonard Shala ka bërë Kallëzim Penal për drejtorin e Drejtorisë për Shërbime Pronësore-Juridike dhe Kadastër në Komunën e Therandës,
Drejtori z.Sylejman Hoxha, me datë 12 mars 2014 ka lidhur kontratë për dhënien e tokës ndërtimore në shfrytëzim "të përkohshëm", me qira me ndërmarrjen "UNICOM" Sh.P.K nga Theranda për një periudhë nëntëmujore respektivisht nga 01 prilli 2014 deri më 31 dhjetor 2014. Objekti i kësaj kontrate është dhënia në shfrytëzim "të përkohshëm" të parcelës P-72116046-02285-0, që gjenden në vendin e quajtur "Gradina /Igraishte/Nogomet" që gjenden në rrugën Brigada 123, Therandë. Parcela në fjalë është pjesë e Stadiumit të Qytetit, që në këtë rast është dëmtuar direkt interesi i qytetarëve si dhe i klubit futbollistik "Ballkani", pasi që sipërfaqja e përgjithshme e kësaj parcele prej 10 372 m² është Stadium i Qytetit. Me heqjen e sipërfaqes prej 1.600 m², stadium nuk i plotëson tashmë kriteret që klubi i futbollit të marrë pjesë në gara.
Meqenëse objekti i kontratës për dhënie në shfrytëzim është pronë e Komunës së Therandës, Komuna e Therandës, respektivisht drejtoria për Shërbime Pronësore-Juridike ka lidhur këtë kontratë në kundërshtim të plotë më ligjin 04/L-144 për dhënie në shfrytëzim dhe këmbim të pronës së paluajtshme që është në pronësi të komunës.
Kjo kundërligjshmëri konsiston në atë se, Komuna ë Therandës, gjegjësisht ekzekutivi i udhëhequr nga kryetari i komunës nuk ka përfillur fare procedurat e parapara me ligj, është anashkaluar aprovimi nga ana e Kuvendit Komunal për nisjen e procedurës për dhënie në shfrytëzim të kësaj parcele, hapjen e procedurës së ankandit publik, procesit të përzgjedhjes së ofertave.
Andaj duke u mbështetur në dispozitat e Nenit të 10-të të KPP-së, kërkojmë nga Prokuroria Themelore në Prizren, të ndërmarrë të gjitha veprimet hetimore në kuadër të konstatimit të vërtetës objektive me pretendimin e këtij kallëzimi për veprën e kryer penale.
Ne mbesim të përkushtuar që ta mbrojmë interesin e qytetarëve, në mënyrë, që interesat e qytetarëve të Komunës sonë të mos cenohen nga individë të caktuar për përfitime të tyre personale, thuhet në njoftimin e VV-së.
