Kosova

Më: 22 nëntor 2014 Në ora: 09:16

Deputeti i Lidhjes Demokratike të Kosovës (LDK), Sadri Ferati, beson se koalicioni PDK - LDK mund të sjellë ndryshime në interes të shtetit dhe të qytetarëve të Kosovës.
Në këtë intervistë për “Epokën e re”, ai ka deklaruar se ky koalicion do të jetë më funksional se ai i kaluari dhe, sipas tij, nuk ka arsye mos ta ketë mandatin e plotë.

“Mendoj se njerëzit pas një përvoje bëhen pak më të mençur. Ky koalicion duhet të jetë më funksional, sepse njerëzit nuk shkojnë duke e humbur dijen, por duke e fituar. Kështu që, edhe ajo përvojë mendoj se do t’i mësojë aktorët kryesorë. Tani e kanë mundësinë të bashkëpunojnë më mirë”, ka thënë Ferati, i cili ka qenë ministër i Pushtetit Lokal në koalicionin e parë të këtyre dy partive politike.

Ferati ka deklaruar se ka gjëra që duhet të merren edhe nga koalicioni i kaluar PDK - LDK, duke shtuar se askush nuk duhet të fshihet pas subjektit politik.

“Asgjë nuk përsëritet në formën e vet. Prandaj, ka gjëra se mund të përdoren nga koalicioni i kaluar, por ka gjëra që duhet të ndryshohen shumë. Mendoj se ato ndryshime duhet të bazohen edhe në një qasje pak më ndryshe se si si ka qenë në të kaluarën. Në rend të parë, mendoj se ministrat e ardhshëm apo kryeministri i ardhshëm nuk duhet të fshihen prapa partive dhe fuqisë politike, por secili duhet ta dëshmojë veten brenda ministrisë dhe institucioneve ku e ushtron përgjegjësinë”, është shprehur ai.

Sa i përket postit të kryeministrit, Ferati ka thënë se favorit për këtë post është lideri i kësaj partie, Isa Mustafa. “Deri më tani LDK-ja të nominuar për kryeministër ka liderin e saj, Isa Mustafën. Ndryshe asnjëherë nuk është diskutuar në forumet e LDK-së. Edhe herën e fundit nuk është diskutuar fare për emra, por është marrë vetëm vendimi që LDK-ja ta mbrojë qëndrimin që kryeministri t’i takojë LDK-së”, ka thënë Ferati.

Ai ka bërë me dije se marrëveshja me PDK-në është e realizueshme vetëm nëse LDK-së i jepet posti i kryeministrit. “Tash po flas personalisht, jo në emër të partisë dhe nuk frikësohem se kjo do të ndodhë, sepse mosdhënia e kryeministrit LDK-së nënkupton prishjen e këtij koalicioni dhe LDK-ja shkon në opozitë”, ka deklaruar Ferati. Ai e ka pranuar se me këtë koalicion e kanë befasuar elektoratin e tyre, i cili edhe mund t’i ndëshkojë.

Sot mund të lexoni Shfletoni kopertinat