Presidentja Jahjaga qysh muajin e shkuar ka marrë ftesën nga Komisioni Trelateral i Komisionit Evropian që në cilësinë e presidentes së Republikës së Kosovës, të marrë pjesë në konferencën rajonale, që do të mbahet në Beograd nga 31 tetori deri më 2 nëntor, ndërsa ende nuk ka marrë vendim nëse do të marrë pjesë apo jo.
Jahjaga pritet të marrë vendimin këto ditë, derisa pjesëmarrjen e kanë konfirmuar kryeministri i Malit të Zi, Millo Gjukanoviq, presidenti i Maqedonisë, George Ivanov dhe ai i Republikës Serbe të Bosnjës, Milorad Dodik.
Kështu ka thënë kryetari i Grupit të Komisionit Trelateral të Serbisë, Jovan Kovaçiq, për agjencinë serbe të lajmeve BETA.
“Presim edhe konfirmimin e zonjës Jahjaga dhe të anëtarit të Presidencës së Bosnje e Hercegovinës, Bakir Izetbegoviqit”, citohet të ketë thënë Kovaçiq.
Konferenca rajonale, që do të trajtonte problemet e Ballkanit, është ftuar nga Komisioni Trilateral, që përbëhet nga BE, ShBA dhe Japonia.