Dren Doli nga Grupi për Studime Politike dhe Juridike, thotë për gazetën “Bota sot” se, shtyrja e seancës është një veprim i pa-precedent dhe jashtë çdo logjike institucionale dhe demokratike.
Doli thekson se, Flora Brovina nuk ka të drejtë as të thërras e as të shtyj seancën e Kuvendit, ndërsa veprimin e fundit Doli e quan tendencë e pushtimit të Kuvendit.
“Besoj që shtyrja e seancës nga përfaqësuesja e Partisë Demokratike të Kosovës përbën, edhe një herë, një veprim të pa-precedent dhe jashtë çdo logjike institucionale dhe demokratike. Së pari, Flora Brovina nuk mban të drejtën që të thërras e aq më pak të shtyj seancën e Kuvendi. Roli i saj fillon në momentin kur Kuvendi mblidhet, dhe po aq përfundon në atë moment kur seanca e Kuvendit ndërpritet apo përfundon. Ky veprim, për më tepër, është tendencë e pushtimit të institucionit të Kuvendit dhe po aq barazim i Kuvendit (si tërësi, pra 120 përfaqësuesve) me një deputet”, thotë Doli.
Ai pohon se, tani deputetët e Kosovës kanë të drejtë që të vendosin për mbajtjen e seancës dhe të ftojnë PDK-në, që të bëjë propozimet për kryekuvendar.
“Besoj që, tanimë, është në të drejtën e deputetëve të Kuvendit të Kosovës që të vendosin kur do të mbahet seanca e radhës dhe të ftojnë Partinë Demokratike të Kosovës që të bëjë propozimet tjera për Kryetarë të Kuvendit”, thotë Dren Doli.