Kryetari i Bashkësisë Islame të Kosovës, Naim Tërnava i tha Zërit të Amerikës se e mbështet çdo veprim kundër ekstremizmit dhe terrorizmit.
Myftiu Tërnava tha se ekstremizmi dhe terrorizmi nuk kanë asgjë të përbashkët as me islamin e as me kombin shqiptar.
Ai tha se e mbështet operacionin e policisë për arrestimin e të dyshuarve për përfshirje në luftërat në Siri e Irak.
Ai tha se Bashkësia Islame e Kosovës do të bëjë gjithë çfarë është e mundur edhe në bashkëpunim me bashkësitë tjera fetare që të ruhet toleranca ndërmjet besimeve të ndryshme.
“BIK është përgjegjëse direkte për nëpunësit e saj të cilët janë të shpërndarë në të gjitha pjesët e Kosovës dhe janë imam aktiv nëpër xhamitë e Kosovës. Rasti që ka ndodhur mbrëmë dhe ku është arrestuar një imam i vetëquajtur, në një xhami në Gjilan, e them kështu ngase ai nuk është imam i cili ka vendim nga BIK-u, absolutisht. Por, megjithatë, ne jemi përgjegjës për aktivitetet që i bëjnë imamët brenda xhamisë. Derisa për aktivitetet e mundshme bëjnë jashtë xhamisë, çfarë ata punojnë pas orarit të punës dhe ku ata gjenden e çfarë veprojnë, ajo është punë të cilën duhet ta kryejnë institucionet e vendit, që sigurisht ata e dinë më mirë se ne se sa janë apo sa mund të jenë ata individë, qofshin imamë, qofshin qytetarë të rëndomtë, kushdo qoftë ai”, tha pos tjerash Tërnava.