Parti e Ramush Haradinajt ka reaguar pas konferencës së Prokurorit që po heton disa ish-udhëheqës të UÇK’së si të implikuar në krimet e pasluftës. Sipas AAK’së, asnjë rast individual nuk e zbeh pastërtinë e luftës çlirimtare të UÇK’së.
Lexojeni të plotë deklaratën e AAK:
Aleanca për Ardhmërine e Kosovës me vëmendje të posaçme e ka ndjekur publikimin e raportit nga Task Forca Hetuese Speciale (SITF) dhe ambasadorit Clint Williamson.
Aleanca konsideron se e tërë puna e Task Forcës dhe Raporti i ambasadorit Williamson janë nje hap përpara drejt sqarimit të akuzave tashmë të njohura për publikun.
Aleanca po ashtu konsideron se ky është një hap i madh në drejtim të duhur për vendosjen e sundimit të ligjit në Kosovë.
Aleanca është e bindur se populli i Kosovës i udhëhequr nga Ushtria Çlirimitare e Kosovës ka bërë luftë të drejtë çlirimtare dhe çfarëdo rasti individual që ka implikime kriminale nuk do ta zbehë pastërtinë dhe misionin çlirimtar të asaj lufte.