Kryetari i Komunës së Ferizajt Muharrem Sfarqa reagoi sot ndaj deponimit të organizatës joqeveritare “Nisma për Aktivizim" në Gjykatën Kushtetuese të Kosovës të kërkesës për ligjshmërinë e urdhëresës që gjashtë festave zyrtare (konkretisht për festën e 1 Majit), të mos punojnë bizneset dhe ndërmarrjet private e publike, pos atyre që caktohen për kujdestari.
"Duke respektuar të drejtën e secilit për të kontestuar ligjshmërinë e vendimeve të institucioneve publike, Kryetari Sfarqa dëshiron t’ia kujtojë bartësit të deponimit në Gjykatën Kushtetuese, se vendimi për të mos punuar shumica e ndërmarrjeve dhe bizneseve private e publike për festën e 1 Majit, është marrë në bazë të Ligjit për festat zyrtare në Republikën e Kosovës, i cili edhe 1 Majin e konsideron festë zyrtare, ndërkohë që ditët e festave zyrtare i definon si ditë të lira për punëtorët, me përjashtime të arsyeshme, kurse Qeverinë e obligon të hartojë listën e institucioneve publike e private që do të obligoheshin të punojnë gjatë këtyre festave. Kjo do të thotë se shumica e institucioneve publike dhe bizneseve private, nuk punojnë gjatë festave.
Prandaj, Kryetari Sfarqa i fton të gjithë ata që nuk i kanë të qarta dispozitat ligjore, t’i lexojnë edhe një herë, para se të ndërmarrin veprime, si ky i OJQ-së “NA” dhe pret nga OJQ-të, mediat dhe qytetarët mbështetje atëherë kur pushteti respekton ligjin.
Kryetari i Ferizajt konsideron se veprimi i kryetarit të OJQ-së “NA”, Albion Sherifi, nuk paraqet gjë tjetër por përpjekje për t’u dukur dhe për të dalë nga anonimiteti, përmes zhurmës mediatike dhe duke u shtirur se gjoja po merret me punë të mëdha, përmes adresimit në Gjykatën Kushtetuese të një çështjeje, e cila mund të zgjidhet fare lehtë në instanca shumë më të ulëta pushtetore".
