Lidhja Demokratike e Kosovës, ka reaguar ndaj fjalimit të Kryeministrit Hashim Thaçi që ka mbajtur me studentët në Universitetin e Prizrenit, i cili ka bërë thirrje për ndihmë për të fituar edhe këto zgjedhje.
Sipas ekspertëve të LDK-së, Hashim Thaçi po i korrupton qytetarët.
“Qeveria e PDK-së dhe kreu i saj, duke e ditur që do të jenë humbës në Zgjedhjet e përgjithshme, pa zgjedhur mjete, kundër ligjeve dhe kundër Kushtetutës, po përpiqen që të korruptojnë qytetarët e të gjitha kategorive. Një qeveri e korruptuar si kjo, mendon se të gjithë mund të korruptohen”, thuhet në reagimin”, thuhet në reagimin e ekspertëve të LDK-së.
Në reagimin e tyre, thuhet se kryeministri i Kosovës, para studentëve në Universitetin Publik të Prizrenit, ka bërë fushatë të hapur dhe ka kërkuar nga studentët që uljen e pagesës ta shndërrojnë në votë për PDK-së, e që sipas tyre është në kundërshtim me ligjin dhe me çdo etikë.
“Lidhja Demokratike e Kosovës dënon tentimin për manipulim masiv të qytetarëve dhe në veçanti të studentëve nga ana e PDK-së”, thuhet në reagim.
Lidhja Demokratike e Kosovës kërkon korrektësi, sjellje ligjore dhe institucionale.
“LDK-ja fton qytetarët të mos mashtrohen nga premtimet e kota të atyre që e rrënuan vendin dhe që nuk mund të shpëtojnë asgjë në fund të mandatit të tyre. LDK-ja angazhohet për korrektësi, përgjegjshmëri, sjellje të dinjitetshme dhe qytetëruese. LDK-ja, me sjelljen e saj, do të vijojë t’i ndihmojë të gjitha proceset normale në vend”, thuhet në reagimin e LDK-së.
Në njoftim të LDK-së thuhet se kjo parti do të japë gjithë ndihmesën e saj për të përgatitur zgjedhje të mira, të lira dhe të ndershme.
