Kryesia e Lidhjes së Historianëve të Kosovës “Ali Hadri” dega në Deçan, reagon ashpër ndaj vizitës së Ilir Metës-kKryetar i Kuvendit të Republikës së Shqipërisë, që i bëri sot në orët e paradites Manastirit të Deçanit.
Historianët ia kujtojnë kryetarit të Kuvendit të Republikës së Shqipërisë Ilir Meta, se ishin prijësit e këtij tempulli fetar që pikërisht në Manastirin e Deçanit, organizuan mesha kishtare, duke i lagur me ujë dhe tymosur me qindra paramilitarë serb, të cilët me pas kryen krimet me të rënda ndaj popullsisë shqiptare në Kosovë.
“Kryesia e LHK ‘Ali Hadri’ dega në Deçan, i kujton Kryetarit të Kuvendit të Republikës së Shqipërisë Ilir Meta, se dje në Konferencën për shtyp me Kryetarin e Kuvendit të Kosovës Jakup Krasniqi, ndër të tjera tha : “...Dihet botërisht që ata që ushtruan gjenocid në Bosnje, në Kroaci, ushtruan gjenocidin edhe në Kosovë, dhe ne ne 16 prill, do të përkujtojmë në Kukës, 15 vjetorin e eksodit të jashtëzakonshëm të gati të mbi 1 milion qytetarëve të Kosovës në Shqipëri, për shkak të gjenocidit të ushtruar nga regjimi i Slobodan Milosevicit...”, kështu ata që benë thirrje për gjenocid, janë prijësit e Manastirit të Deçanit dhe Kryepopi i saj Sava Janjici, ndërsa ju sot u takuat me te. E kemi të qartë së sot e keni marrë bekimin e Kryepopit të Manastirit të Deçanit, por shumë më rënd për ju zotëri Ilir Meta është mallkimi i qytetarëve të Komunës së Deçanit”, thuhet në reagim.
Kryesia e LHK “Ali Hadri” dega në Deçan, nëpërmjet kësaj komunikate , i bënë thirrje Manastirit të Deçanit dhe Kryepopit, Sava Janjicit, që të kërkojnë falje për krimet dhe thirrjet që i bënë kundër qytetaret të Deçanit.
“Kërkimi i faljes, do të jetë një akt human dhe natyrshëm së çdo vizitë në këtë tempull fetarë, nuk do të vlejë me shumë së një fotografi rasti për kujtim”.
Ndryshe, kryekuvendari i Shqipërisë, Ilir Meta po qëndron për një vizitë dyditore në Kosovë, ku ka pasur takime të shumta me përfaqësues të institucioneve shtetërore dhe partive politike të Kosovës.
