Tahiri: Kemi partneritetin amerikan në luftën kundër krimit

Bota e Yjeve

Tahiri: Kemi partneritetin amerikan në luftën kundër krimit

Më: 21 shkurt 2015 Në ora: 19:13

Zëri i Amerikës: Zoti Tahiri! Ju morët pjesë në Samitin kundër ekstremizimit këtu në Uashington. Sa është problem dhe sa ekziston në Shqipëria dukuria e radikalizimit? Në analizën tuaj, a është rritur ekstremizmi muajt apo vitet e fundit?

Saimir Tahiri: Është rritur sigurisht vitet e fundit, sepse është rritur në nivel global, pra rrjedhimisht edhe në nivel rajonal, edhe në Shqipëri. Nga ana tjetër, është rritur përpjekja e shtetit tonë dhe e shteteve për të luftuar këtë dukuri, që deri dje nuk njihte vëmendjen e duhur. Ne kemi provuar që pas procedimeve penale dhe arrestimeve të vitit të kaluar ka njohur një frenim të dukshëm dukuria e organizimit dhe dërgimit të qytetarëve shqiptarë në Siri apo në vende ku ka konflikt të natyrës ekstremiste apo të terrorizmit. Veprimi efiçent dhe në kohë për të luftuar këtë dukuri jep efekte të menjëhershme. Kjo është goditja e pjesës më të dukshme të kësaj dukurie, por ndërkohë një zgjidhje më e qëndrueshme mbetet në luftimin e faktorëve, që e gjenerojnë.

Zëri i Amerikës: Zoti Tahiri! Kohët e fundit në Shqipëri ka patur një sërë incidentesh me shpërthime me bomba. Sa shqetësuese është për ju gjendja e rendit në vend?

Saimir Tahiri: Nuk ka asgjë për t'u habitur që krimi të reagojë kundër përpjekjes tonë për të luftuar botën e krimit dhe kjo do të thotë që ne jemi në rrugën e duhur dhe që përfaqësuesit e botës së krimit nuk gjejnë asnjë shteg që të bashkëpunojnë apo të negocionojnë me policinë e shtetit apo me instancat qeveritare. Dukuri si shpërthimet e eksplozivëve ka pasoja të menjëhershme në tronditjen e besimit të publikut, por sot e them pa asnjë droje se Shqipëria është një vend shumë më i sigurtë se dje. Kjo bazohet në treguesit e luftës kundër krimit dhe aksesit që kanë qytetarët në policinë e shtetit për të ndarë shqetësimin që në fazat paraprake dhe për të kërkuar zgjidhje të qëndrueshme për problemet e tyre në institucionet e vendit dhe veçanërisht në policinë e shtetit.

Zëri i Amerikës: Dakord, por ky krim po bëhet aq i fuqishëm, sa që po sfidon shtetin drejtpërdrejt...

Saimir Tahiri: Ne po zhvillojmë hetime të thelluara për t'i dhënë përfundimisht zgjidhje çështjeve që kanë të bëjnë jo vetëm me shfaqjet e dhunshme të kriminalitetit por edhe me tronditjen e besimit të publikut, siç janë ngjarjet me eksploziv. E them me bindje: nuk do të jetë e gjatë koha kur të tillë njerëz do të dalin para drejtësisë dhe të vuajnë dënimin e merituar.

Zëri i Amerikës: Takimi që ju patët me FBI-në këtu në Uashington a pati lidhje të drejtpërdrejtë me hetimet që po bëhen tani?

Saimir Tahiri: Nuk ka lidhje të drejtpërdrejtë, sepse edhe në hetimet që po zhvillojmë tani e kemi asistencën e partnerëve ndërkombëtarë dhe konkretisht FBI-së. Por takimi që zhvillova në zyrat qendrore me drejtuesit më të lartë të FBI-së, po kështu edhe në departament të shtetit, në departamentin e drejtësisë, në Byronë kundër terrorizmit apo në departamentin e luftës kundër drogës shtruan bazën mbi të cilën do të ngrihet një partneritet shumë më i qëndrueshëm.

Zëri i Amerikës: Zoti Tahiri, a mund të ndani me publikun se në çfarë pistash po hetohet?

Saimir Tahiri: Jemi në rrugë të mbarë, por nuk mund të flas unë para atyre që po zhvillojnë hetimet sot. Policia e shtetit është tërësisht e angazhuar bashkë me prokurorinë për t'i çuar para hetimet dhe besoj se shumë shpejt do të kemi rezultate pozitive.

Zëri i Amerikës: Zoti Tahiri, meqenëse një sërë rastesh të bujshme në Shqipëri nuk janë zgjidhur, si për shembull, vrasja e gjykatësit në Vlorë dhe sidomos vrasja e bankierit Santo në Tiranë, në publik ka dyshime mbi gadishmërinë e shtetit për të goditur për të goditur. Cila është përgjigja juaj?

Saimir Tahir: Unë nuk besoj që dyshohet angazhimi ynë në luftë kundër krimit të organizuar pa asnjë dallim. Unë nuk besoj që ka dyshim rreth mundësisë tonë për të çuar përpara procesin e reformimit të sektorit të sigurisë, të policisë së shtetit, apo drejtësisë kriminale në tërësi, përfshi këtu edhe reformën në sistemin gjyqësor për ta bërë të pamundur që kriminelë, të cilët kapen shkojnë në proces gjyqësor, marrin dënime fare të vogla dhe pastaj riciklohen në shoqëri duke e kthyer kërcënimin në shoqëri.

Zëri i Amerikës: Cila është hallka më e dobët në gjithë këtë sistem mendoni ju? Pse nuk zbulohen krime të tilla të bujshme?

Saimir Tahiri: Krime të pazbuluara ka në çdo vend dhe ky nuk është tregues për punën e agjencive ligjzbatuese. Tregues është shkalla e besueshmërisë së publikut tek institucionet dhe tek policia e shtetit. Unë do të dëshiroja që me këtë çelës të lexohej edhe puna e institucioneve dhe e policisë lidhur me luftën kundër krimit të organizuar. Mos harroni që deri para pak kohësh Shqipëria ishte një vend i zhytur në drogë. Vetëm vitin e kaluar ne arritëm rezultate që ishin fare të pamendueshme kundër drogës, po t'i krahasoni edhe me tetë vitet e kaluara të mbledhura bashkë.

Zëri i Amerikës: Zoti Tahiri, meqenëse ju përmendet operacionet e drogës në disa pjesë të vendit, a mendoni se problemi është eleminuar në thelbin e tij? A ka zyrtarë në rangje të larta që e drejtojnë me një dorë të padukshme drogën në Shqipëri?

Saimir Tahiri: E sigurtë është që situata në të cilën e gjetëm vendin me kultivimin dhe trafikimin e lëndëve narkotike nuk mund të degradonte aq shumë nëse nuk do të kishte më e pakta mbyllje sysh nga ata që qeverisnin deri dje vendin.

Zëri i Amerikës: Zoti Tahiri, me ndryshimin e administratave ju keni patur kritika nga opozita dhe ndoshta edhe nga të tjerë, se ju keni hequr nga policia edhe ekspertë që janë përgatirur nga të huajt. A ka ndikuar kjo në dobësimin e forcës goditëse të policisë?

Saimir Tahiri: Nëse këta që po thoni ju do të kishin bërë detyrën, Shqipëria nuk do të ishte këtu ku është dhe nuk do të kishim trashëguar atë nivel të madh të kriminalitetit, të përhapjes së kriminalitetit në raport me popullsinë dhe të kultivimit e trafikimit të lëndëve narkotike. Ama, një gjë është e sigurtë: ne duhet të jemi të gjithë të vetdijshëm që policia e shtetit e vetme nuk mund të bëjë asnjë rezultat, nëse shoqëria në tërësi nuk bindet se duhet të luftojmë bashkarisht krimin e organizuar, korrupsionin dhe terrorizmin.


Më të lexuarat
Sot mund të lexoni Shfletoni kopertinat