Sot 32 vjet nga vdekja e diktatorit Enver Hoxha. Më 11 Prill të vitit 1985, Enver Hoxha u nda nga jeta, ndërsa ditën e sotme rrjetet sociale janë mbushur me foto nga lamtumira e fundit e shqiptarëve për diktatorin.
Ndryshe vjen studiuesi Kastriot Dervishi me këtë kolazh fotografish ku tregon momentin e revoltës së shqiptarëve në vitin 1992.
Ata zhvarrosin diktatorin, ndërsa këto foto janë dëshmi të trupit të Enver Hoxhës, në momentet që është nxjerrë nga varri. Vihet re se trupi nuk është tretur.
Foton me krahasime, Dervishi e shoqëron me një shkrim ku sipas tij, renditen gjithë të ligat që Enveri u ka bërë shqiptarëve.
Nga Kastriot Dervishi
Për çfarë duhet ta kujtojmë Enver Hoxhën?
Në "përkujtim" të 11 prillit 1985, ditës së vdekjes zyrtare të diktatorit komunist të Shqipërisë, po rendis disa arsye pse emri i tij duhet kujtuar. Ka shumë arsye më tepër se kaq, por unë mendoj se ai duhet kujtuar për:
-Luftën civile të viteve 1943-1944.
-Eksodin e vitit 1944.
-Shkatërrimin e shtetit shqiptar të ndërtuar me aq sakrificë në vitet 1920-1939.
-Përçarjen e madhe midis shqiptarëve nga zhvillimi i luftës së klasave.
-Ndërtimin e shtetit eksperimental sovjetik me tipare klanore dhe krahinore.
-Vrasjen dhe burgosjen e inteligjencies shqiptare të shkolluar nga Perëndim.
-Grabitjen e vjedhjen e 320 tonë flori.
-Grabitjen e individit, pronave dhe sendeve të tjera të paluajtshme
-Bashkimin doganor dhe monetar me Jugosllavinë.
-Izolimin e Shqipërisë nga bota dhe aleancat me armiqtë shekullorë të Shqipërisë.
-Shkatërrimin e natyrës me çpyllëzime, vepra industriale të panevojshme e me humbje financiare dhe ekologjike.
-Gatimi i njeriut të ri internacionalist proletar.
-Burgimet, internimet e persekutimet e popullsisë.
-Shkatërrimin e rrjetit arkivor të vendit dhe pasurisë kulturore të vendit.
-Për urinë dhe rreckosjen që i shkaktoi shqiptarëve si rrallë herë në histori.
-Për dëmet e shumta që asnjë pushtues nuk i shkaktoi vendit sa i shkaktoi regjimi i tij.
-Prapambetjen e thellë në të cilën e la vendin.
Bashkëlidhur katër foto, dy prej të cilave janë shkrepur më 13.4.1985 kur bëheshin nderimet dhe dy të tjera më 3.5.1992, ditën kur arkivoli i Hoxhës u hoq nga varrezat e dëshmorëve.
