Kosova ka një numër të madh të talenteve të sporteve me dorë, ndër to është edhe hendbollistja gjakovare Edona Radoniqi. Edona është një emër që po vjen dhe lojtarja më e mirë në klubin e Vëllaznimit nga Gjakova. Ajo në takimin e fundit realizoi 14 gola, por nuk e shmangu humbjen e Vëllaznimit me rezultat të thellë 31:15 nga Kastrioti, në takimin që u zhvillua në palestrën e sportit “Bill Klinton” në Ferizaj. Edona luan në pozitat qendër dhe bek i majtë, është e gjatë 173 centimetra, e cila me fizikusin që ka, premton shumë në të ardhmen. Edona shpreson se do të ikin nga fundi i tabelës.
“Ne shpresojmë që do të ikim nga fundi i tabelës, pasi që kemi filluar me punë intensive me ardhjen e dy trajnerëve Hamza Gjuka dhe Uran Luzha, si dhe rikuperimin e bashkëlojtares A. Kursani”, tha Edona për gazetën kombëtare “Bota sot”. Talentja e këtij sporti thotë se skuadrës i duhet më shumë hapësirë: “Vëllaznimit për momentin i mungon hapësirë më e madhe e ushtrimeve, që janë të mangëta, pasi që terminet janë të shumta në palestër”. Gjakovaret kanë ekip papërvojë dhe kjo po reflekton edhe në lojën e tyre.
“Neve edhe pse na mungon përvoja, por me këtë lloj pune që jemi duke e zhvilluar në vitet a ardhshme do të shfaqim rezultate më të mira”, theksoi ajo. Synimet e Edonës janë të mëdha dhe shpreson në një të ardhme të luajë edhe në një klub të madh jashtë vendit: “Unë kam vetëm 16 vjeç dhe synimet e mia për të ardhmen janë të jem një hendbolliste e shkëlqyer në Kosovë”.
Hendbollistja është optimiste se shumë shpejt do të vijnë edhe sukseset. “Falë angazhimit të lojtareve dhe punës së kryesisë, trajnerëve, ditët e mira do të vijnë shumë shpejt”, shpreh optimizmin Edona. Në fundjavë, Vëllaznimi do të ndeshet me Samadrexhën, e cila është edhe derbi i skuadrave që synojnë ta sigurojnë mbijetesën. “Synimi ynë dhe i Shtabit Teknik është disiplina dhe loja e bukur, pasi që këto dy ndeshje janë me rëndësi, atëherë ne do të japim maksimumin”, thotë Edona. Vëllaznimi është në fund të tabelës me 3 pikë, dy me pak se Samadrexha që mban pozitën e parafundit (i shtati) me 5 pikë.
